Давлат энди бу мол-мулкни мусодара қилмоқчи.
Миллий хавфсизлик давлат қўмитаси жиноий авторитет Қамчибек Колбаев (Қамчибек Асанбек) етакчилик қилган уюшган гуруҳ бартараф этилганининг дастлабки натижаларини ошкор қилди.
Махсус хизмат маълумотларига кўра, “Асанбек ва унинг шериклари товламачилик ва босқинчилик йўли билан қўлга киритган мол-мулкни легаллаштиришга алоқадор бўлган ҳамда бошқа оғир жиноятларни содир этган 40 дан ортиқ жиноий гуруҳ фаоллари ва етакчилари қўлга олинган».
МХДҚ 2008 йилдан буён Колбаев тузган жиноий гуруҳ фаолиятини таҳлил қилар экан, Қамчибек Колбаев “тизимли ва мақсадли равишда жиноий империя яратганини” ҳамда “жиноий фаолият орқали ноқонуний равишда бойиб, доллардаги миллиардерга айланганини” қайд этган.
Идоранинг маълумотларига кўра, Колбаев, унинг қариндошлари ва шерикларининг ноқонуний тарзда орттирилган бойликлари қаторига 850 дан ортиқ кўчмас мулк киради: виллалар, коттежлар, ҳашаматли уйлар, қурилаётган бинолардаги квартиралар, дам олиш масканлари, оромгоҳлар, ресторанлар, ер участкалари, отхоналар ва ов масканлари, 60 дан ортиқ ҳашаматли автомобиллар, қимматбаҳор заргарлик буюмлари ва бошқа мол-мулклар.
“Асанбекка тегишли мулкнинг бир қисми қонунга хилоф равишда давлат тасарруфидан чиқарилган, яна бир қисми ҳақиқий эгаларидан тортиб олинган. Ушбу мулкни давлатга ва жабрланган шахсларга қайтариш ишлари олиб борилмоқда. МХДҚ ушбу мулкнинг бир қисмини давлат даромадига айлантириш жараёнини аллақачон бошлаб юборган. Иккита қурилиш лойиҳасининг ўзида Асанбекка 700 дан ортиқ хонадон тегишли бўлган, улар давлат тасарруфига ўтди. Асанбек ноқонуний йўллар билан қўлга киритган барча активларининг дастлабки умумий қиймати қарийб 1 миллиард долларни ташкил этади, уларга тақиқ қўйилди. Асанбек ва унинг атрофидаги шахсларнинг ноқонуний активларини топиш мамлакатимиз ичида ҳам, хорижда ҳам, хусусан, Россия, Қозоғистон, Грузия, Туркия, БАА ва Японияда давом этади”, — дейилади МХДҚ баёнотида.
Миллий хавфсизлик давлат қўмитаси раиси Қамчибек Ташиев тадбиркорларга мурожаат қилиб, уюшган жиноий гуруҳларга пул беришни тўхтатишга чақирди.
“Мен тадбиркорларга, хорижий инвесторларга, ресторан ва бозор эгаларига, савдогарларга мурожаат қилмоқдаман. Агар сиз илгари жиноий дунё вакилларига пул бериб келган бўлсангиз, бу ишни тўхтатинг. Агар уларни молиялашда давом этсангиз, сиз ҳам жавобгарликка тортиласиз”, дейди Ташиев.
Ташиев тадбиркорлар ва хорижий инвесторлардан пул ундириш, шунингдек, мулкларини тортиб олиш ҳолатлари аниқланаётганини таъкидлаб, жабрланганлар МХДҚга мурожаат қилишини сўраган.
Қирғизистон махсус хизматлари 4 октябрь куни Бишкекда ўтказган амалиётда Қамчибек Колбаев ўлдирилган эди. “Қонундаги ўғри” 2020 йил октябрь ойида ҳам Қирғизистон Жиноят кодексининг 249-моддаси (жиноий гуруҳ тузиш) бўйича қўзғатилган жиноят иши доирасида қамоққа олинган эди. Ўша йилнинг ноябрида у саломатлиги важидан ахлоқ тузатиш колониясига ўтказилган.
2021 йил 2 март куни Бишкек суди унга нисбатан қўлланган чорани ўзгартириб, яшаш манзилини тарк этмаслик ҳақидаги тилхат билан қўйиб юборган.
Бу орада Колбаев жиноий йўл билан топилган катта миқдордаги маблағни легаллаштиргани учун терговга жалб этилгани ўртага чиққан.
Колбаев уюшган жиноий гуруҳ бошлиғи сифатида Қирғизистон ички ишлар вазирлиги ҳисобида турган.
2012 йилда АҚШ уни йирик наркобарон деб топиб, собиқ Иттифоқ мамлакатларининг 10 нафар криминал авторитети қаторида “қора рўйхат”га киритган.
2021 йил март ойида эса Давлат департаменти Колбаевни қўлга олиш, жазога тортиш, шунингдек, у асос солган жиноий гуруҳнинг молиявий схемасини йўқ қилишга кўмак берувчи маълумот учун мукофотни 5 миллион долларга оширган.
Бишкекда отиб ўлдирилган ўғрибоши “Братский круг” халқаро жиноят ташкилотининг Қирғизистондаги шўъбаси раҳбари деб кўрилган.
Қамчибек Колбаев ўлдирилганидан кўп ўтмай, жиноят оламининг бир неча йирик вакили ижтимоий тармоқларда “қонундаги ўғри” мақомидан воз кечганини ва давлат қонунларига риоя қилган ҳолда яшаш ниятида эканликларини эълон қилган.
