Бишкек шаҳар суди 12 июль куни Ленин тумани судининг “Азаттиқ Медиа”ни (Озодликнинг қирғиз хизмати) оммавий ахборот воситаси ўлароқ ёпиш ҳақидаги қарорини бекор қилиб, Озодлик билан Маданият вазирлиги ўртасидаги муросавий келишувни тасдиқлади.
Шу тариқа, “Азаттиқ” фаолиятини тўхтатишга оид иш тўхтатилди.
Озод Европа/Озодлик радиоси (RFE/RL) медиакорпорацияси веб-сайтларида контент сақлашнинг умумий протоколлари ўзгаргани эътиборга олинса, контент серверда абадий сақланмайди, шу важдан вазирлик аризасида эътирозга сабаб бўлган видеони бундан буён RFE/RL веб-сайтларидан кўриб бўлмайди. Суднинг муросавий келишувни тасдиқлаганига қарорини ҳисобга олиб, Маданият вазирлиги Қирғизистон Рақамли ривожланиш вазирлигига “Азаттиқ” сайтидан блокировкани олиб ташлаш зарурлиги ҳақида хат йўллайди.
Эслатиб ўтамиз, жорий йилнинг 27 апрелида Бишкекнинг Ленин тумани суди Маданият вазирлигининг “Азаттиқ”ни ОАВ сифатидаги фаолиятини тўхтатиш тўғрисидаги аризасини қаноатлантирган эди. Суднинг бу қарори ортидан қатор хорижий давлатлар, халқаро ташкилотларнинг ваколатхоналари ва Қирғизистон медиаташкилотлари ташвиш билдиришган.
Ўтган йил 26 октябрида Маданият вазирлиги “Настояшчее время. Азия” дастуридан ўрин олган қирғиз-тожик чегарасидаги можаро ҳақидаги лавҳа туфайли “Азаттиқ Медиа” сайтларини блокировка қилиш тўғрисида қарор чиқарган. Вазирлик бу чора блокировка қарорига сабаб бўлган материал ўчириб ташланмагунича давом этишини уқтирган.
“Азаттиқ” бу қарор бекор қилинишини сўраб, судга мурожаат қилган. Март ойида Бишкек маъмурий суди “Азаттиқ Медиа” аризасини рад этган. Май ойида эса Бишкек шаҳар суди бу қарорни ўз кучида қолдирган эди.
