22 март куни пойтахтнинг Первомайский туман суди Facebookдаги «Полит Узник» саҳифаси асосчиси Ирис Жекшеналиевга нисбатан уй қамоғи тарзидаги эҳтиёт чорасини узайтирди. Бу ҳақда унинг адвокати Нурбек Сидиқов маълум қилди.
Жекшеналиев 2023 йилнинг 25 майигача уй қамоғида бўлади. Адвокат, шунингдек, томонларнинг баҳси 3 апрель куни бўлиб ўтишини қўшимча қилди.
“Суд прокуратура талабига биноан Ирис Жекшеналиевнинг уй қамоғи муддатини узайтирди. Биз барча гувоҳларни сўроқ қилдик. Куни кеча сиёсатшунослик ва лингвистик экспертиза доирасида хулоса қилган экспертлар ҳам сўроқ қилинди. Муҳокамада қарама-қаршиликлар мавжуд. Суд ишни холис кўриб, фаолни оқлаши керак”, — деди Сидиқов.
Ўтган йилнинг август ойларида фаол «Полит Узник» саҳифасида Қирғизистон Миллий хавфсизлик давлат қўмитасининг собиқ раҳбари Абдил Сегизбоевнинг Жетим-Тоо кони ҳақидаги узоқ йиллик видеомурожаатини эълон қилган эди. Шундан сўнг, Ирис Жекшеналиев Қирғизистон ИИВ тергов хизматига сўроққа чақирилиб, сўнгра пойтахт ИИБ тергов изоляторига икки суткага жойлаштирилди.
Жекшеналиевга нисбатан Қирғизистон Республикаси Жиноят кодексининг 278-моддаси 3-қисми (“Давлат мансабдор шахсларининг қонуний талабларига фаол бўйсунмаслик ва оммавий тартибсизликларга чақириш, шунингдек, фуқароларга нисбатан зўравонлик қилишга чақириш”) билан жиноят иши қўзғатилган. 2022 йил август ойида у Бишкекдаги 1-тергов изоляторига жойлаштирилди.
Кейинроқ, ўтган йилнинг октябрь ойида Бишкек шаҳар суди Жекшеналиевни уй қамоғига озод қилиш ҳақида қарор қабул қилган.
