Бирлашган Миллатлар ташкилоти (БМТ) Қирғизистонда конституциявий ҳокимиятнинг қонуний вакили сифатида фақат президент Сўўрўнбай Жээнбековни тан олади. Бу ҳақда БМТ Бош котибининг Марказий Осиё бўйича махсус вакили Наталья Герман 12 октябрь куни Қирғизистон ташқи ишлар вазири Чингиз Айдарбеков билан телефон орқали қилган мулоқоти пайтида билдирди.
Ташқи ишлар вазирлигининг билдиришича,
мулоқот давомида
Наталья Герман БМТ Қирғизистоннинг ишончли ҳамкори эканини ва бу ҳамкорлик давом эттирилишини таъкидлаб, мамлакатда юзасга
келган сиёсий инқирозни тинч
йўл билан бартараф этишга чақирди.
Герман президент барча сиёсий кучларнинг қўллови остида тўғри қарорларни қабул қила олишига умид билдирди.
Аввалроқ БМТ Бош котиби
Антониу Гутерриш Қирғизистондаги вазиятдан ташвиш билдириб, сиёсий инқирозни тинч йўл билан бартараф этишга чақирган эди.
Қирғизистонда 4 октябрь куни бўлиб ўтган парламент сайловидан
кейин сиёсий бўҳрон вужудга
келган. Сайлов натижаларини бекор қилиш талаби билан бошланган норозилик акциялари тартибсизликларга
айланиб кетган.
6 октябрга ўтар кечаси намойишчилар президент аппарати ва парламент фаолият
юритадиган “Оқ уй” ва ҳамда Миллий хавфсизлик давлат қўмитаси биносини эгаллаб олишган.
Ўша тунда қамоқдаги қатор сиёсатчилар,
шу жумладан 10 октябрь куни парламент томонидан бош вазирликка тасдиқланган Садир Жапаров, Қирғизистоннинг собиқ президенти
Алмазбек Атамбаев (у 10 октябрь куни қайта қўлга олинган) ва унинг тарафдорлари озод қилинган.
Сиёсий кучлар ягона фикрга келолмаётгани учун мамлакатда ҳокимият инқирози ҳамон давом этмоқда.
9 октябрь куни президент Сўўрўнбай Жээнбеков ўз видеомурожаатида вазият барқарорлашиб, янги ҳукумат тайинлангандан сўнг истеъфога кетишга тайёр эканини билдирган.
12 октябрь куни Сўўрўнбай Жээнбеков пойтахт Бишкек ҳудудида фавқулодда ҳолат режимини такроран жорий этишга оид фармонни имзолади.
