Қирғизистон Миллий хавфсизлик давлат қўмитаси ўзбек журналисти Бобомурод Абдуллаевни Ўзбекистонга экстрадиция қилди. Бу ҳақда Хавфсизлик қўмитаси вакили Раҳат Сулаймонов Озодлик радиосининг қирғиз хизматига маълум қилган.
«Халқаро қидирувда бўлган Абдуллаев 8-август куни Тошкентнинг илтимосига биноан ҳибсга олинган. 10-август куни Первомайский округ суди уни бир ойга МХДҚ тергов ҳибсхонасида сақлашга қарор чиқарди. Абдуллаев 22-август куни Ўзбекистонга экстрадиция қилинди”, дейди Раҳат Сулайманов.
У ўзбек журналистининг экстрадиция қилинишида Қирғизистон қонунлари ва халқаро шартномаларга риоя қилинганини таъкидлаган.
Миллий хавфсизлик давлат қўмитасининг баёнотида: «Ўзбекистон томони Бобомурод Абдуллаевнинг ҳуқуқларини тўлиқ ҳимоя қилиш, жумладан адвокат билан таъминлаш, тиббий ёрдам бериш ва қийноқ, ноинсоний муомала қилинмасликни кафолатлади”, дейилади.
Бобомурод Абдуллаев, 8-август куни Бишкекда Миллий хавфсизлик давлат қўмитаси ходимлари томонидан ҳибсга олинган. Абдуллаевнинг сўзларига кўра, у Ўзбекистонда жиноят содир этганликда гумон қилиниб, халқаро миқёсда қидирувга берилган ва Ўзбекистон расмийларининг илтимосига биноан ҳибсга олинган.
Аввалроқ, бир қатор халқаро ташкилотлар Қирғизистон расмийларидан Бобомурод Абдуллаевни Ўзбекистонга топширмасликни талаб қилган.
