Марокашда юз берган зилзилада, сўнгги хабарларга кўра, икки мингдан ортиқ инсон ҳалок бўлган. Бу ҳақда давлат телеканали мамлакат Ички ишлар вазирлигига таяниб хабар бермоқда.
Яна 1800дан ортиқ одам жароҳатланган.Мамлакатда уч кунлик мотам эълон қилинган.
Reuters агентлигининг ёзишича, Юқори Атлас тоғ тизмаси ҳудудида жума кечаси юз берган ер силкиниши магнитудаси 7,2 баллни ташкил этган. Аввалроқ АҚШ Геология хизматининг дастлабки маълумотларига асосланган ҳолда зилзила 6,8 баллни ташкил этгани хабар қилинганди.
«Бу ушбу ҳудудда қайд этилган энг кучли зилзиладир», деб айтган марокашлик сейсмолог Лахсен Мханни. Унинг сўзларига кўра, тоғли ҳудудларда бу миқёсдаги зилзила кам учрайди.
Зилзила эпицентри аҳоли зич яшайдиган Марракеш шаҳридан 70 километр узоқликда ва машҳур Укаймеден тоғ-чанғи курорти яқинида жойлашган.
Марокашликлар тармоқларда бўлишган видеолардан зилзиладан қадимги Марракешнинг ЮНЕСКО Жаҳон мероси рўйхатига киритилган машҳур қизил деворлари зарар кўргани англашилади.
Марокаш расмийларининг таъкидлашича, вайронагарчиликларнинг аксарияти аҳоли пунктларидан ташқарида содир бўлган – аммо тоғли қишлоқларга бориш имкони чекланганлиги сабабли, офатнинг аниқ кўлами ҳалигача номаълум.
