Жўғорғу Кенеш спикери Нурланбек Шакиев болага она исмини шариф сифатида бериш мумкинлиги ҳақидаги Конституциявий суд қарори жамиятда “катта шов-шув” чиқарганини ва қирғизлар учун “катта зарба” бўлганини айтди.
“Мамлакатимизда бундай қарор қабул қилиниши мумкин эмас эди. Фикримча, бу қарорни қабул қилган Конституциявий суд раиси ва судьялари зудлик билан истеъфога чиқиши лозим. Бу уят, миллатга хиёнат. Энди бу қарорни тузатиш учун мана шундай қонун лойиҳаларини киритишга тўғри келмоқда”, деган 6 сентябрь куни бўлиб ўтган парламент йиғилишида парламент раиси.
Аввалроқ Президент ва Вазирлар Маҳкамасининг парламентдаги вакили Алмасбек Абитов “Қирғизистон Конституциявий суди тўғрисида”ги қонунга ўзгартиришлар киритиш масаласини кун тартибига киритишни сўради. У президент Садир Жапаров депутатлардан ташаббусни зудлик билан кўриб чиқиш ҳақидаги тақдимномасини ўқиб эшиттирди.
Гап Конституциявий судга ўз қарорларини бекор қилиш ёки қайта кўриб чиқиш имконини берадиган қонун лойиҳаси ҳақида кетмоқда. Амалдаги таҳрирга кўра, Конституциявий суднинг қарорлари якуний ҳисобланади ва қайта кўриб чиқилиши мумкин эмас. Таклиф этилаётган ўзгартиришлар қабул қилинса, тегишли Конституция нормалари ўзгарса ёки президент, КС раиси таклифига биноан КС ўз қарорларини қайта кўриб чиқиши ёки бекор қилиши мумкин. Шунингдек КС қарорлари миллатнинг маънавий ва ахлоқий қадриятларга зид деб топилса ҳам бекор қилиниши мумкин бўлади.
Парламентнинг тегишли қўмитаси қонун лойиҳасини
5 сентябрь куни биринчи ўқишда маъқуллади.
Жорий йилнинг июлида Конституциявий суд болаларнинг шарифи сифатида отасининг исми ўрнига онасининг исмини ҳам бериш мумкинлиги ҳақида қарор чиқарган эди. Фаол Олтин Капалованинг мурожаатига жавобан Конституциявий суд вояга етган шахслар ўзига шариф сифатида отасининг ёки онасининг исмини танлаш ҳуқуқига эга бўлиши кераклигини таъкидлаган. КС ушбу қонституциявий қарор жамиятда урф бўлган анъаналарга зид эмаслигини урғулаган.
Шундан сўнг Миллий хавфсизлик давлат қўмитаси раиси Қамчибек Ташиев “шариф сифатида ҳеч қандай она исми қабул қилинмаслигини» билдирган эди. Кейинроқ президент маъмурияти Конституциявий суд қарорларини қайта кўриб чиқишга имкон берувчи қонун лойиҳасини ишлаб чиққан ва парламентга тақдим қилган.
