Ёзувчи ва публицист Олжобай Шокир суд қарори билан 2 ойга ҳибсга олинди. Бу ҳақда унинг адвокати маълум қилди.
Олжобай 23 август куни ғойиб бўлганди. Кейинроқ унинг Миллий хавфсизлик давлат қўмитасида эканлиги маълум бўлган
Унинг рафиқаси Назгул Бодбаеванинг Озодликка айтишича, Шокир 23 август куни тушда уйда ёлғиз бўлган, бироқ кейин ғойиб бўлган.
“Уйга келсам уй очиқ, Олжобой эса йўқ эди. Телефони ўчирилган. У қариндошлар билан боғланмаган экан. Биз унинг қаердалигини билмаймиз. Уйга келганимда Бишкек милиция ходимлари ҳам келишди. Улар 31 август куни Олжобай айтган акция ҳақида гаплашиш учун келганликларини айтишди”, деди у.
“Қилим шами” ташкилоти раҳбари Гулшайир Абдирасулованинг Озодликка айтишича, Олжобай Шокир ўз адвокати билан бирга Миллий хавфсизлик давлат қўмитасида сақланмоқда.
Маҳаллий ОАВнинг адвокат Бахит Автандилга таяниб хабар беришича, журналист Олжобай Шакир 48 соат ҳибсга олинган.
Адвокатга кўра, журналист ҳуқуқ-тартибот идоралари ходимларига фаол бўйсунмасликка чақириш, тартибсизликларга чақириш ва ҳокимиятни эгаллаб олишга уринишда айбланмоқда.
“Бу асоссиз айбловлар. Олжобай Шокир зудлик билан озод этилиши керак. Эртага эҳтиёт чораси Бишкекнинг Первомайский туман судида кўриб чиқилади. Масаланинг бутун моҳияти шундан иборатки, айрим экспертизалар тайинланган. Текширувлар якунлангач, Олжобай Шокирга нисбатан жиноий иш қўзғатилди”, — деди Бахит Автандил ОАВга.
52 ёшли ёзувчи Олжобай Шокир ҳокимиятни тез-тез танқид қилади. У 31 август куни ҳокимиятнинг ноқонуний хатти-ҳаракатларига қарши норозилик акцияси ўтказиш ташаббуси билан чиқди.
