Суд қарори билан парламентнинг собиқ депутати Асия Сасиқбоева, Қирғизистоннинг Туркиядаги собиқ элчиси Мамбетжунус Абилов, Конституциявий суднинг собиқ судьяси Клара Сооронқулова, МСК собиқ аъзоси Гулнора Жўрабоева уй қамоғига озод қилинди.
Бундан ташқари, суд фаоллар Улуқбек Маматаев ва Таалайбек Мадаминовга нисбатан ҳам худди шундай қарор чиқарган. Озодлик радиосининг қирғиз хизматига кўра, фаол Чингиз Капаров ҳам уй қамоғига озод этилган. 11 апрель куни Капаров тергов изоляторидан касалхонага ётқизилгани сабаб суд унинг иштирокисиз қарор қабул қилди.
Унинг адвокати Бахитбек Автандил Озодликка берган интервьюсида фаолга ўт пуфаги деворларининг яллиғланиш жараёни бўлган калкулёз холецистит ташхиси қўйилганини айтди.
2022 йил октябрь ойида полиция 30 га яқин фаол, сиёсатчи ва ҳуқуқ ҳимоячисини оммавий тартибсизликлар уюштиришга тайёргарлик кўрганликда айблаб ҳибсга олди. Ҳибсга олинганларнинг барчаси Кампиробод сув омборининг Ўзбекистонга ўтказилишини очиқ танқид қилиб, ҳибсга олинишига айнан шу гаплар сабаб бўлган, деб ҳисоблайди.
Тергов, Кампиробод мудофаа қўмитаси йиғилишларидаги аудиоёзувларга таянган ҳолда, йиғилганлар гўёки кенг кўламли митинглар тайёрлаб, ҳокимиятни қўлга олмоқчи бўлганликларини билдирган.
