Бир ҳафта аввал ижтимоий тармоқларда кўнгилли қиз, касалхонага олиб келган одам, ёрдам кўрсатилмаганлиги ортидан ўлиб қолгани ва бунга қайғурган қиз йиғлаб юборгани акс этган видео тарқалган эди. Бу холат юзасидан Қирғизистон Ички ишлар вазирлиги тергов ишларини олиб борган ва эркак тирик эканини аниқлаган.
Маълум бўлишича А. Мурзаева «Ёшлар ташаббуси маркази» жамоат ташкилотида кўнгилли бўлиб ишлайди.
16-июл куни соат 10:50да, марказга «Оқ-Ўргў» турар-жой мавзейида, кўчада бир эркак ҳушидан кетиб ётгани ҳақида хабар келади. Воқеа жойига этиб борган кўнгиллилар, нафас олиши ёмонлашган одамни тунги касалхонага элтадилар.
Шифокорлар касалхонада бўш жойлар йўқлигини айтиб, бироқ бироз муддатдан сўнг беморни сунъий нафас олиш ускунасига улайди. Ўн дақиқадан сўнг, шифокорлардан бири олиб келинган одам юрак ҳуружи сабаб вафот этганини айтади.
«Кўнгиллилар кетгандан сўнг, эркак ҳушига келди, у клиник ўлим ҳолатида экан», – дея тушунтирган Ички ишлар вазирлиги.
Қирғизистон Республикаси Ички ишлар вазирлиги эркакнинг шахси аниқланганини, у Арча-Бешик мавзесида яшовчи 45 ёшли Жўлўман Каримшаков эканини маълум қилди.
Жўлўман Каримшаковнинг сўзларига кўра, ўша куни соат 22:00ларда у маст бўлган, қон босими кўтарилиб, “Оқ-Ўргў” турар-жой массивида йўлда кетаётиб, йиқилиб тушган.
«Касалхонага кетаётиб, бир неча бор ҳушимни йўқотдим. Келганимда кўнгилли бир қизни кўрдим. Мен қизга қарадим ва айтдим: «Сиз қизим билан бир ёшдасиз, мен қизимни жуда яхши кўраман, агар тўсатдан ўлсам, «Қизимга яхши кўришимни етказинг» дедим. Кейин ҳушимдан кетдим. Кўзимни очсам, шифохонада сунъий нафас олиш ускунасига уланган холда ётибман. Муолажа тугаганидан сўнг, шифокорларнинг рухсати билан уйга келдим», дейди Жўлўман Каримшаков.
