Буюк Британия Қирғизистонда ўрта ва кичик бизнесни қўллаб-қувватлаш сармоя жамғармасини ташкил этади.
Қирғизистон ўз халқаро ҳамкорларини бемалол танлаш ҳуқуқига эга бўлиши керак. Бундай фикрни 22 апрель куни Британия ташқи ишлар вазири Девид Кемерон Бишкекка ташрифи чоғида билдирган.
Қирғизистонда у президент Садир Жапаров ва Ташқи ишлар вазири Жеенбек Кулубаев билан музокаралар ўтказди. Кемероннинг маълум қилишича, Қирғизистон раҳбарияти билан икки давлат ўртасидаги ҳамкорлик муҳокама қилинган.
Кемерон Қирғизистоннинг сув ресурсларига бой эканлигини таъкидлаган. Иқлим ўзгариши шароитида экологик лойиҳаларни қўллаб-қувватлаш зарурлигини инобатга олиб Буюк Британия Қирғизистонда ўрта ва кичик бизнесни қўллаб-қувватлаш сармоя жамғармасини ташкил этишини маълум қилди.
Қирғизистон президенти матбуот хизматининг хабарига кўра, Кемерон билан, жумладан, икки мамлакат ўртасида таълим ва мавсумий меҳнат миграцияси масалалари бўйича ҳамкорликни кенгайтириш муҳокама қилинди.
Бу Британия ташқи ишлар вазирининг Қирғизистонга илк ташрифидир.
Кемерон шу ҳафта Марказий Осиёнинг бешта давлати ва Мўғулистонга сафар қилади. У сафарни Тожикистондан бошлаган, Бишкекка эса 22 апрель куни кечқурун етиб келган.
