Арстан Алай деган таҳаллус билан танилган бишкеклик тадбиркор Арстанбек Абдилдаев 5 январда Қирғизистондаги 31-сонли жазони ижро этиш маҳкамасида вафот этди. Бу ҳақда Озодликнинг қирғиз хизматига унинг адвокати Қайсин Абакиров билдирди. У Арстан Алай ўлими сабабларини очиқламади.
Қирғизистон Жазони ижро этиш хизмати бу хабарга ҳозирча муносабат билдирмади.
Миллий хавфсизлик давлат қўмитаси 2023 йил 15 декабрда Арстанбек Абдилдаев “диний низо қўзғатганлик”да гумонланиб қўлга олинганини билдирган эди. Расмий маълумотда Абдилдаев ўзини “Янги Худо” ва “Масиҳ” сифатида эълон қилгани, бошқа динларнинг “нотўғри таълимот” эканини иддао қилгани унинг қамоққа олинишига сабаб бўлгани тўғрисида айтилган.
Бишкекнинг Октябрь туман суди Абдилдаевга нисбатан 15 январгача қамоққа олиш эҳтиёт чорасини қўллаган эди.
Бишкекдаги қурилиш ширкати ва қатор автомобилга ёқилғи қуйиш шаҳобчалари эгаси экани айтиладиган Арстанбек Абдилдаев 2011, 2017 ва 2021 йилларда ўтган сайловларда Қирғизистон президентлигига ўз номзодини кўрсатган. У 2020 йилда ўзини “Янги Худо” деб эълон қилган.
Абдилдаев 2011 йилнинг октябрида Бишкекда ўтган матбуот анжуманларидан бирида Одам Атонинг Y хромосомаси қирғизларга таалуқли экани, инсониятни яқинлашиб келаётган балолардан “мураккаб биоробот Владимир Путин ва қирғизлар қутқаришини”, жорий йилда умуман қиш бўлмаслигини иддао қилиб, “Зима не будет” деб баёнот бергани ортидан машҳур бўлган эди. Ижтимоий тармоқларда тарқалган бу видеони бир неча кун ичида 4 миллиондан ортиқ одам кўрган.
