Скорякин уни Бишкекдан Москвага олиб келишгандан сўнг аэропортнинг ўзидаёқ ФСБ ходимлари томондан қийноққа тутилганини айтмоқда.
Қирғизистондан ўғирлаб кетилган фаол Лев Скорякинни Домодедово аэропортида ФСБ ходимлари телефони ва ноутбукини қулфдан чиқаришни талаб қилиб қийноққа солган. Бу ҳақда “Медиазона” нашри Скорякиннинг адвокатларига таяниб хабар бермоқда.
Скорякин Бишкекда 17 октябрга ўтар кечаси ўғирлаб кетилган эди. Фаол яшаётган жойга иккита автомашинада ўн киши келган. «Новая газета Европа» нашрида мавжуд маълумотларга қараганда, улар ўзларини милиция ходимлари деб таништирган ва Скорякинни олиб чиқиб кетган.
Июнда ҳам Скорякин Бишкекда Россия сўрови билан қўлга олинган эди. У сентябрда Бишкекдаги ҳибсхонадан озод қилинганди. Қирғизистон Бош прокуратураси уни Россияга экстрадиция қилишдан бош тортган.
Россияда Скорякин безориликда айбланмоқда. У 2021 йил декабрида Москвада ФХХ биноси олдида «С днем ЧКиста» деган акция ўтказганидан сўнг жиноят иши очилган. Россия махсус хизматлари уни қидирувга берган. Фаол Россияда 7 йилгача қамалиши мумкин.
“Мемориал” ҳуқуқ ташкилотининг билдиришича, Скорякин Қирғизистондан Германияга кетишни режалаштираётган эди. У 16 октябрда Германия гуманитар визасини олган эди. Аммо у Германияга кетишга улгурмаган, чунки Бишкекка Путиннинг келиши арафасида Скорякиннинг Россия паспорти олиб қўйилган.
