Қирғизистон Конституциявий суди болага шариф сифатида она исмини олишга рухсат берадиган ўз қарорини бекор қилди, деб хабар бермоқда КС матбуот хизмати.
Июлда Конституциявий суд болаларнинг шарифи сифатида отасининг исми ўрнига онасининг исмини ҳам бериш мумкинлиги ҳақида қарор чиқарган эди. Фаол Олтин Капалованинг мурожаатига жавобан Конституциявий суд вояга етган шахслар ўзига шариф сифатида отасининг ёки онасининг исмини танлаш ҳуқуқига эга бўлиши кераклигини таъкидлаган. КС ушбу қонституциявий қарор жамиятда урф бўлган анъаналарга зид эмаслигини урғулаган.
Бироқ КСнинг бу қарори жамиятда катта шов-шув чиқарган. Жўғорғу Кенеш спикери Нурланбек Шакиев бу қарор қирғизлар учун “катта зарба” бўлганини айтган.
“Мамлакатимизда бундай қарор қабул қилиниши мумкин эмас эди. Фикримча, бу қарорни қабул қилган Конституциявий суд раиси ва судьялари зудлик билан истеъфога чиқиши лозим. Бу уят, миллатга хиёнат. Энди бу қарорни тузатиш учун мана шундай қонун лойиҳаларини киритишга тўғри келмоқда”, деган 6 сентябрь куни бўлиб ўтган парламент йиғилишида парламент раиси.
Миллий хавфсизлик давлат қўмитаси раиси Қамчибек Ташиев ҳам “шариф сифатида ҳеч қандай она исми қабул қилинмаслигини» билдирган эди.
