Қирғизистон захирасида 51 тоннадан ортиқ олтин мавжуд, уни Марказий банк тасарруф этади. Вазирлар Маҳкамаси бу олтиндан фойдалана олмайди.
Миллий банкнинг олтинлари Вазирлар Маҳкамасига берилиши ва иқтисодиётни ривожлантириш учун ишлатилиши керак. Шундай ташаббус билан 23 октябрь куни Жўқорғи Кенешнинг депутати Балбак Тулобоев чиққан.
Тулобоевнинг фикрича, Қирғизистонда қисқа вақтда даромад келтирадиган лойиҳа ва объектларга маблағ ажратилмаяпти.
“Миллий банкда 52 тонна олтин шунчаки ётибди. Нега бу 1 млрд долларлик олтинни Вазирлар Маҳкамасига ишлатишга бермаймиз? Ҳукумат орқали тадбиркорларга шу миллиардни беринг ва улар давлатни қандай ривожлантириб юборишини кўринг. Иқтисодиётни ўрта ва кичик бизнес ривожлантиради. Нега биз бу олтиндан фойдаланмаймиз? Олтин шунчаки ётмасдан, ишлаши керак”, – дейди Тулобоев.
Молия вазири Алмаз Бакетаев бу ташаббусга изоҳ бераркан, “масала ёпиқ эшиклар ортида муҳокама қилиниши лозимлигини”, яқин орада тегишли қонун лойиҳаси депутатларга тақдим этилишини айтган.
Аввалроқ Балбак Тулобоев нима учун олтинлар Хитой олдидаги қарзни тўлаш учун ишлатилмаётганига қизиққан эди.
Қирғизистон захирасида 51 тоннадан ортиқ олтин мавжуд, уни Марказий банк тасарруф этади. Вазирлар Маҳкамаси бу олтиндан фойдалана олмайди.
