Қурманбек Бакиев ва унинг тўнғич ўғли Марат Бакиев Қирғизистонда сиртдан 30 йиллик қамоқ жазосига ҳукм қилинган.
Қирғизистон парламенти Жўқорғу Кенеш спикери Нурланбек Шакиевнинг Беларусда собиқ президент Қурманбек Бакиев билан учрашуви ҳақидаги маълумотлар ҳақиқатга тўғри келмайди, деди спикернинг матбуот котиби Алтинбек Деркембаев Озодлик радиоси билан суҳбатда.
“Раҳбарларнинг расмий ташриф дастури олдиндан тузилади, унда икки давлат давлат протокол хизматлари ҳамкорликда ишлайди, барча учрашувлар ошкор ўтказилади. Спикерга кўплар ҳамроҳлик қилди, мендан бошқа элчихона ходимлари ҳам учрашувларда қатнашган. Қурманбек Бакиев билан ҳеч қандай учрашув бўлмаган”, — деди Деркембаев.
Ўтган ҳафта парламент раиси Нурланбек Шакиев бошчилигидаги парламент делегацияси Беларус пойтахтида мамлакат раҳбарияти билан учрашувлар ўтказган эди.
Аввалроқ интернетда Шакиев ҳамда депутатлар Элмурза Сотибалдиев ва Бактибек Сидиқов Минскда собиқ президент Қурманбек Бакиев билан учрашгани ҳақида маълумот тарқалди.
Депутат Элмурза Сотибалдиев ўзи Қурмонбек Бакиев билан учрашганини тасдиқлади. У собиқ президентнинг уйида эмас, нейтрал жойда учрашганини айтди.
«Бакиев менинг президентим бўлган. Бирга ишлашганмиз. Аёлининг вафотига таъзия билдириб, учрашиб, суҳбатлашдик», деди депутат.
2010 йил апрелида Қирғизистонда иккинчи инқилоб содир бўлди. Қурманбек Бакиев, унинг қариндошлари ҳамда уларга яқин бўлган бир қатор амалдорлар мамлакатдан қочиб кетган эди.
Қурманбек Бакиев ва унинг тўнғич ўғли Марат Бакиев Қирғизистонда сиртдан 30 йиллик қамоқ жазосига ҳукм қилинган. Собиқ давлат раҳбарининг кенжа ўғли Максим Бакиев, укаси Жаниш Бакиев ва собиқ бош вазир Данияр Усенов сиртдан умрбод қамоқ жазосига ҳукм қилинган.
Қурманбек Бакиев 2010 йилдан бери Минскда истиқомат қилади.
