Қирғизистон Вазирлар Маҳкамаси ем-хашак ва гуручни ҳорижга сотишни тақиқлади.
Қишлоқ хўжалиги вазирлиги матбуот хизматининг хабарига кўра, мораторий олти ойга киритилди. Энди гуруч, арпа, жўхори ва ем-хашак (пичан, сомон, омухта ем, кепак ва дон еми) каби маҳсулотларни ҳорижга сотиш тақиқланади. Бунда емларнинг реэкспорти, транзити ва Вазирлар Маҳкамаси томонидан кўрсатиладиган гуманитар ёрдам сифатида четга чиқарилиши чекланмаган.
Эслатиб ўтамиз, июль ойи охирида Қирғизистон Қишлоқ хўжалиги вазирлиги емни ташқи бозорларга экспорт қилишни “чеклаш бўйича чора-тадбирлар”ни жорий этишни тавсия қилган эди. Бошқарма бошлиғи Асқарбек Жанибековнинг сўзларига кўра, жорий йилда емнинг заҳира ҳажми талабдан 30 фоиз камроқ бўлган. Унинг эслатишича, худди шундай мораторий ўтган йили ҳам жорий қилинган ва Иқтисодиёт ва савдо вазирлиги, Қишлоқ хўжалиги вазирлиги билан биргаликда, Қирғизистонга олиб кирилаётган ем учун имтиёзларни жорий этишни кўриб чиққан.
Аввалроқ қирғиз чорвадорлари ёз иссиқ келгани ва ёғингарчилик кам бўлгани учун ҳосил яхши бўлмаганидан шикоят қилган эди.Бу эса уларни чорва молларини сотишга мажбур қилган, натижада чорва моллари сони камайиб кетган. Қишлоқ хўжалиги вазирлиги маълумотларига кўра, август ойида Қирғизистонда 7470 бошдан ортиқ қорамол ва 10420 бошдан ортиқ майда шохли моллар экспорт қилинган бўлса, 2770 бош қорамол ва 6 бош майда шохли моллар импорт қилинган.
