Қирғизистон Республикаси Олий суди Ўмурбек Бакиров Жогорку Кенеш депутати этиб сайланган 4-сонли Кўк-Жар бир мандатли сайлов округи бўйича сайлов натижаларини бекор қилиш ҳақидаги аввалги судларнинг қарорларини ўз кучида қолдирди.
Қуролли кучлар матбуот хизматининг Азаттиққа хабар беришича, бундай ҳукм 18 август куни қабул қилинган. Ўмурбек Бакировнинг ўзи Азаттиққа берган интервьюсида бу қарорни ноқонуний деб атади.
Эслатиб ўтамиз, 26 июль куни Бишкек шаҳар суди Бишкек маъмурий судининг Ўш вилоятининг Ноокат туманидаги юқорида қайд этилган сайлов округи бўйича сайлов натижаларини бекор қилиш тўғрисидаги 7 июнь куни қабул қилган қарорини ўз кучида қолдирган эди. Бунга Равшанбек Рисбоевнинг даъвоси сабаб бўлди – у 2021 йилги парламент сайловида ҳам ушбу округдан депутатликка номзодини қўйган эди. Даъвогар овоз бериш натижаларини ҳақиқий эмас деб топишни сўради.
2022 йил охирида, ушбу суд жараёни бошлангани маълум бўлгач, Ўмурбек Бакиров унинг мандат олишининг қонунийлигини текшириш «парламентга босим» эканлигини айтди.
Бундан бир ой аввал, 17 ноябрь куни Жогорку Кенешда қирғиз-ўзбек чегараси бўйича келишувларни кўриб чиқиш чоғида депутат Миллий хавфсизлик давлат қўмитаси раҳбари Қамчибек Ташиев билан бахслашган эди. Ўша куни Ўмурбек Бакиров кўриб чиқилаётган қонун лойиҳаларига «қарши» овоз берди. Шундан кейинги кун, 18 ноябрь куни парламентарий Оқ уйнинг еттинчи қаватидаги кабинетидан ҳайдаб чиқарилди. Ушбу масалани ўрганиш учун депутатлик комиссияси тузилиб, кўпчилик аъзолари ўз ҳамкасбини идорадан чиқариб юбориш ноқонуний, деган хулосага келишди.
Орадан бир ой ўтиб Ўмурбек Бакиров Миллий хавфсизлик давлат қўмитасида сўроқ қилинганини айтди. Шундан сўнг махсус хизмат депутат криминал бошлиқ Қамчи Кўлбоев билан учрашгани ҳақида маълум қилди ва видеони далил сифатида эълон қилди.
Ўмурбек Бакиров Жогорку Кенешнинг уч чақириқ депутати. У илк бор 2010 йилда «Ата-Журт» партиясидан сайланган, 2011 йил сентябрида V чақириқ депутати бўлган. 2015 йилги парламент сайловларида ҚСДП партияси сафида иштирок этган, 2018 йилда мандат олган.
