Қирғизистон Республикаси Ташқи ишлар вазирлиги Кариб денгизида қирғизистонлик оиланинг АҚШга кетаётганда ҳалок бўлиши мумкинлиги ҳақидаги маълумотга изоҳ берди.
Департамент маълумотларига кўра, Қирғизистон Республикасининг АҚШдаги элчихонаси Кариб ҳавзаси мамлакатлари тегишли идоралари билан воқеа ҳолатларига ойдинлик киритиш бўйича иш бошлаган.
Аввалроқ «Настоящее время» нашри Марказий Американинг 7 давлати орқали АҚШга ноқонуний кирган қозоғистонлик билан суҳбатни чоп этган эди. Унинг айтишича, Кариб денгизида қирғизистонлик бутун оила қайиқдан тушиб кетган.
Жорий йилнинг май ойида Мексика ва АҚШ ўртасидаги чегарада коронавирус пандемияси сабабли жорий қилинган чекловлар олиб ташланди. Шу билан бирга, Мексика миграция хизмати АҚШга киришга ҳаракат қилаётган Мавритания, Қозоғистон, Ўзбекистон ва Қирғизистон фуқаролари кўпайганини маълум қилди.
Расмий маълумотлар сўнгги йилларда АҚШга Мексика билан чегара орқали ноқонуний киришга уринаётганлар сони ортиб бораётганини тасдиқлади.
