Жогорку Кенеш депутати Ўмурбек Бакиров ўзи 2021 йилда депутат этиб сайланган Кўк-Жарский бир мандатли сайлов округи бўйича сайлов натижаларини бекор қилиш қарори устидан Олий судга шикоят қилмоқчи.
Бу ҳақда 31 июль куни депутатнинг ўзи маълум қилди.
У Бишкек шаҳар судининг биринчи инстанция қарорини ўз кучида қолдирган йиғилишида иштирок этмаганини таъкидлади.
“Мен суд жараёнида таътилда эдим, кейинроқ Бишкек шаҳар суди шундай қарор қабул қилганини билдим. Адвокат билан маслаҳатлашдим, Олий судга мурожаат қиламиз. Ҳозирча бу иш юзасидан бошқа изоҳ бермайман”, — деди депутат.
7 июнь куни Бишкек маъмурий суди Ўш вилоятининг Ноокат туманидаги 4-сонли бир мандатли Кўк-Жарский сайлов округи бўйича сайлов натижаларини бекор қилди.
2021 йилги парламент сайловида ушбу округда иштирок этувчи номзодлардан бири Равшанбек Рисбоев овоз бериш натижаларини ҳақиқий эмас деб топиш юзасидан судга даъво аризаси билан мурожаат қилган, унга кўра Ўмурбек Бакиров Жогорку Кенеш депутати бўлган. Суд ҳукмига кўра, Қирғизистон Республикаси Сайлов ва референдум ўтказиш марказий комиссиясининг мазкур округ бўйича сайловни ўтган деб топиш ва Ўмурбек Бакировни ғолиб деб эълон қилиш тўғрисидаги қарорлари бекор қилинди.
26 июль куни Бишкек шаҳар суди Маъмурий суд қарорини ўз кучида қолдирди.
2022 йил охирида Ўмурбек Бакиров Рисбоевнинг судга берган мурожаати ҳақида маълум қилди ва унинг мандат олишининг қонунийлигини текшириш “парламентга босим” эканлигини таъкидлади.
Бундан бир ой аввал, 2022 йилнинг 17 ноябрь куни Жогорку Кенешда қирғиз-ўзбек чегараси бўйича келишувларни кўриб чиқиш чоғида Ўмурбек Бакиров Миллий хавфсизлик давлат қўмитаси раҳбари Қамчибек Ташиев билан оғзаки жанжаллашган эди. Ўша куни Ўмурбек Бакиров кўриб чиқилаётган қонун лойиҳаларига «қарши» овоз берди. Шундан кейинги кун, 18 ноябрда парламентарий Оқ уйнинг еттинчи қаватидаги кабинетидан ҳайдаб чиқарилди. Ушбу масалани ўрганиш учун депутатлик комиссияси тузилиб, кўпчилик аъзолари ўз ҳамкасбини идорадан чиқариб юбориш ноқонуний деган хулосага келишди.
Орадан бир ой ўтиб Ўмурбек Бакиров Миллий хавфсизлик давлат қўмитасида сўроқ қилинганини айтди. Шундан сўнг махсус хизмат депутат криминал бошлиқ Қамчи Кўлбоев билан учрашгани ҳақида маълум қилди ва видеони далил сифатида эълон қилди.
Ўмурбек Бакиров Жогорку Кенешнинг уч чақириқ депутати. У илк бор 2010 йилда «Ата-Журт» партиясидан сайланган, 2011 йил сентябрида V чақириқ депутати бўлган. 2015 йилги парламент сайловларида ҚСДП партияси сафида иштирок этган, 2018 йилда мандат олган. 2021 йилги сайловларда у бир мандатли Кўк-Жарский сайлов округи бўйича сайланган.
