Франция ИИВ маълумотларига кўра, мамлакатдаги тартибсизликлар чоғида 700 дан ортиқ кишиқўлга олинган, бироқ вазият аввалги кунга нисбатан тинчроқ.
Франция ҳуқуқ-тартибот идоралари полициячи томонидан ўлдирилган ўсмир иши бўйича тартибсизликларнинг тўртинчи кечасида 719 кишини қўлга олди. Бу ҳақда 1 июль, шанба куни эрталаб мамлакат Ички ишлар вазирлиги Twitter’да маълум қилди.
Маҳкама маълумотларига кўра, намойишчилар билан тўқнашувларда 79 нафар полициячи яраланган. Бироқ, бутун мамлакат бўйлаб хавфсизлик кучларининг сафарбар этилиши туфайли зўравонлик интенсивлиги пасайган, дея билдирди Ички ишлар вазирлиги.
Франция ички ишлар вазири Жералд Дарманин полиция ва жандармлар билан учрашиш учун кечаси Париж ғарбидаги Мант-ла-Жоли шаҳрига келди, деб хабар берди BFMTV. Ташриф чоғида у тартибсизликлар кўлами аввалги кечага қараганда «анча кичикроқ» бўлганини, Ил-де-Франснинг баъзи ҳудудларида эса вазият «ўта тинч» эканини айтди. Шу билан бирга, у Марсел ва Лионда «қабул қилиб бўлмайдиган зўравонлик»ни қайд этди.
Жума куни кечқурун Марсел мэри Бенуа Паян мамлакат расмийларини шаҳарга «зудлик билан қўшимча ҳуқуқ-тартибот кучларини юбориш»га чақирди. «Марселдаги талончилик ва зўравонлик ҳолатларини қабул қилиб бўлмайди. Мен бу вандализм ҳаракатларини қаттиқ қоралайман», деб ёзди у Twitter’да.
Ички ишлар вазирлиги раҳбари Жералд Дарманен 30 июнь куни кечқурун TF1 телеканали эфирида чиқиш қилиб, 1 июлга ўтар кечаси кўчаларда тартибни таъминлаш мақсадида 45 минг полициячи жалб этилишини айтди. Таққослаш учун: 29 июндан 30 июнга ўтар кечаси шу мақсадда 40 минг полициячи жалб қилинган эди.
Ўсмир билан боғлиқ фожиа 27 июнь куни юз берган. Полиция маълумотларига кўра, машинани бошқараётган Наэл М. исмли йигит унинг талабларини бажаришдан бош тортган. Ëш ҳайдовчини отган 38 ёшли полициячи қасддан қотилликда гумон қилиниб, ҳибсга олинган.
27 июнь куни ижтимоий тармоқларда воқеа акс этган видео тарқалди. Ундан кўриниб турибдики, сариқ рангли машинани текшириш вақтида полициячилардан бири ҳайдовчига қурол ўқталиб турган. Машина узоқлашаётганда полициячи ўқ узган ва ҳайдовчининг кўкрагини нишонга олган. Воқеа жойига етиб келган шифокорлар Наэлни қутқара олмади.
Маълумотларга кўра, у билан бирга машинада яна икки киши бўлган. Улардан бири қочишга муваффақ бўлган, иккинчиси – вояга етмаган шахс, қўлга олинган, аммо 29 июнь куни эрта тонгда қўйиб юборилган.
