Шавкат Мирзиёевнинг қарори билан, 27 январ куни Бишкекда имзоланган келишув тасдиқланди. Унга кўра, Ўзбекистон ва Қирғизистон фуқаролари икки мамлакат чегарасини ID-карта ёрдамида кесиб ўтиши мумкин бўлади.
27 апрел куни президент Шавкат Мирзиёев “Халқаро шартномани тасдиқлаш тўғрисида” қарор имзолади.
Унга кўра, ИИВ ҳамда ДХХ Чегара қўшинлари ушбу халқаро шартномани амалга ошириш учун масъул бўлган ваколатли органлар этиб белгиланди.
Икки давлат фуқароларининг чегарани ID-карта орқали кесиб ўтишига рухсат, энди Қирғиз томонининг ушбу Баённомани тасдиқлашидан сўнг амалга ошади.
Юқоридаги ҳужжатда, жумладан, Ўзбекистон ТИВга ушбу халқаро шартноманинг кучга кириши учун зарур бўлган давлат ички тартиб-таомиллари бажарилганлиги ҳамда уни амалга ошириш учун масъул бўлган ваколатли органлар тўғрисида Қирғизистон томонига тегишли билдиришномани юбориш вазифаси қўйилган.
Эслатиб ўтамиз, аввалроқ ушбу тартибнинг бугунги кунгача ҳали бирорта давлат билан йўлга қўйилмагани, Қирғизистон бу борада биринчиси экани айтилган эди.
Янги тартиб қачондан кучга кириши маълум эмас. Енгиллик амалиётга татбиқ этилгач, фуқароларнинг чегарадан кириш-чиқиши ҳақидаги маълумотлар электрон тарзда қайд этилади, паспортга штамп босишга ҳожат қолмайди.
Бу тартиб исталган транспорт орқали (самолёт, поезд, автомобил, автобус ва ҳк) чегарани кесиб ўтишда амал қилиши айтилган.
