Қирғизистонда “Бешинчи канал” ва «Пирамида» давлат телеканаллари банкрот бўлгани сабабли тугатилади.
Бу ҳақда Қирғизистон Республикаси маданият, ахборот, спорт ва ёшлар сиёсати вазири ўринбосари Чингиз Эсенгул уулу маълум қилди.
Мулозимга кўра, телеканалларни «Қумтор» ва Бишкек ҳокимлиги тасарруфига ўтказиш қарори бекор қилинган.
“Телеканалларни тугатиш бўйича якуний қарорни Давлат мулкини бошқариш давлат агентлиги қабул қилади. «Қумтор» ҳақиқатан ҳам уларни [ТВ каналларини] ўз назоратига олишдан бош тортди”, — деди Эсенгул уулу.
Давлат мулкини бошқариш давлат агентлигидан батафсил маълумот олишнинг иложи бўлмади.
Жорий йилнинг январь ойида Давлат мулкини бошқариш агентлиги раиси ўринбосари Медер Машиев давлат агентлиги молиялаштришни тўхтатгани сабаб, «Пирамида»ни «Қумтор» ёки “Қирғиз олтин” компанияси, “Бешинчи канал”ни эса катта эҳтимол билан Бишкек ҳокимлиги бошқаришини айтган эди.
«Бешинчи канал» Қирғизистонда 2005 йилдан эфирга узатила бошлаган. У 2010 йилгача хусусий компания томонидан бошқарилган. Апрель воқеаларидан кейин у миллийлаштирилди. Мустақил Қирғизистоннинг илк телеканалларидан бири «Пирамида» 1994 йил декабрь ойида ташкил этилган. «Бешинчи канал» сингари у ҳам 2010 йил апрель воқеаларидан кейин миллийлаштирилди.
