ЭлТР давлат телеканали «ПолитКлиника» нашри устидан Бишкекнинг Свердловский туман судига даъво аризаси билан мурожаат қилди. Бу ҳақда нашрнинг ўзида хабар берилган.
ПолитКлиника журналистларининг таъкидлашича, судга мурожаат қилишларига Қирғизистоннинг энергетика саноати учун хорижий кредитлар олгани ҳақидаги материаллари сабаб бўлган. Давлат канали ПолитКлиника “нотўғри маълумот” жойлаштирганини даъво қилиб, таҳририятдан 7 миллион сом товон пули тўлашни сўрамоқда. Материал муаллифи журналист Тинистан Асипбекдан эса телеканал маънавий зарар учун компенсация сифатида 3 миллион сом сўрамоқда.
Аввалроқ, 9 февраль куни ЭлТР давлат телеканали ПолитКлиника нашри устидан судга шикоят қилиш учун ҳужжатлар тайёрлаётгани маълум бўлган эди. Президент маъмуриятининг Ахборот сиёсати хизмати раҳбари Дайирбек Ўрунбеков ҳам ўзининг Facebookдаги саҳифасида «ПолитКлиника» сайти журналистларини “нотўғри маълумот” чоп этишда айблади.
Кейин ПолитКлиника веб-сайти асосчиси ва бош муҳаррири Дилбар Алимова Озодликка берган интервьюсида нашр фақат тасдиқланган маълумотларни чоп этишини айтди. Унинг сўзларига кўра, ПолитКлиника материалидаги маълумотлар очиқ манбалардан олинган.
ПолитКлиника – мустақил нашр бўлиб, янгиликлар ва фактларни текшириш материаллари, текширувлар ва ҳисоботларни нашр этади.
Сўнгги ойларда, экспертларга кўра, Қирғизистонда мустақил матбуот ва сўз эркинлигига босим кучайган.
