Жогорку Кенеш депутати Шайлобек Атазов 1 февраль куни Қирғизистонда ТикТок ижтимоий тармоғини блоклашни таклиф қилди.
Атазовнинг сўзларига кўра, ТикТок ёш авлодга салбий таъсир кўрсатади ва миллий мафкурага зиддир. У Маданият вазирлигини ижтимоий тармоққа эътибор қаратишга чақирди.
“Маданият вазирлигига бу борадаги ишларни амалга ошириш бўйича топшириқ бериш керак. Одамлар ТикТокни оилавий томоша қилишади. Миллий мафкурага амал қилиш керак”, – дейди Атазов.
Бу Қирғизистонда ТикТокни блокировка қилиш бўйича Жогорку Кенеш депутатларининг биринчи таклифи эмас. 2022 йил сентябрь ойида депутат Нодира Нарматова ТикТокда “бемаъни материаллар” эълон қилинганини даъво қилди. Яна бир депутат Жанибек Қидиқбоев ҳам ўтган йилнинг ноябрь ойида ижтимоий тармоқни блоклашни ёқлаб, бу болаларга “салбий таъсир” қилганини таъкидлаган эди.
ТикТок – бу қисқа видеоларни яратиш ва томоша қилиш учун яратилган машҳур ижтимоий тармоқ. Дунёдаги энг кўп юклаб олинган иловалардан бири Хитойнинг ByteDance компаниясига тегишли.
Кўп сонли қирғизистонликлар ТикТокдан фаол фойдаланадилар. Бундан ташқари, Қирғизистонда бир неча ўнлаб таниқли блогерлар ушбу хизматда контент яратишади.
