2013 йилда Бишкек ИЭМни модернизация қилиш чоғида коррупцияга йўл қўйиш айби билан ҳукм қилинган Қирғизистоннинг икки собиқ бош вазири турли колонияларга ўтказилди.
Жазони ижро этиш давлат хизматининг 22 апрел куни хабар беришича, 15 йилга озодликдан маҳрум қилинган собиқ бош вазир Сапар Исаков мамлакат шимолидаги Петровка қишлоғидаги №8 колонияга этап қилинди, яна бир собиқ бош вазир Жанторо Сатибалдиев етти ярим йиллик қамоқ жазосини ўташ учун Бишкек яқинидаги №47 колонияга жўнатилди.
11 йилу уч ой қамоққа ҳукм қилинган «Электрические станции» компаниясининг собиқ бош директори Салайдин Авазова Бишкекдаги тергов изоляторидан Чуй вилояти Молдовановка қишлоғидаги №27 колонияга ўтказилди.
«Бишкекдаги СИЗО-1 бугунги кунда тўлиб кетган. Вазият шу даражага келдики, шундоқ ҳам тўлиб кетган вақтинчалик сақлаш изоляторидаги маҳбусларни жазони ижро этиш муассасасига жўнатишга қарор қилинди. Маҳкумларни колонияга этап қилиш амалга оширилди», – дея изоҳ беришди Жазони ижро этиш давлат хизматининг ходимлари.
Сапар Исаков, Жанторо Сатибалдиев ва Салайдин Авазов пойтахтдаги ИЭМни модернизациялаш чоғида коррупция иши бўйича ҳукм қилиндилар. Бундан аввалроқ Жазони ижро этиш давлат хизмати улар коронавирус тарқалиши муносабати билан жорий этилган фавқулотда ҳолат режими тугаганидан кейин колонияга ўтказилишини маълум қилган эди.
Исаковнинг адвокати Нурбек Токтакунов аввалроқ баёнот бериб, бу ҳаракатлар ноқонуний эканлигини, чунки Биринчи май туман суди ҳукуматнинг собиқ раҳбарлари фигурант бўлган Тарих музейини таъмирлаш бўйича ишни ҳамон кўриб чиқаётганлигини айтди.
Пойтахтдаги ИЭМни модернизациялашдаги коррупция иши бўйича ҳукм Бишкек суди томонидан 2019 йил декабрида чиқарилган эди, март ойида апелляция инстанцияси ҳукмни деярли ўзгартирмади.
