Қозоғистон бош санитар врачи Айжан Есмагамбетова 17 августдан бошлаб карантин чоралари босқичма босқич юмшатилиши борасидаги фармойишни имзолади.
Унда, жумладан, қуйидаги мамлакатлардан учиб келган самолётларнинг йўловчилари коронавирус манфий ПЦР-тести борасидаги маълумотномани тақдим қилмаслик мумкинлиги қайд қилинади: Хитой, Жанубий Корея, Япония, Грузия, Тайланд, Венгрия, Ҳиндистон, Германия, Чехия, Малайзия, Бирлашган Араб Амирликлари, Беларусь, Туркия, Миср, Украина, Нидерландия, Россия. Бу мамлакатлардан келганлар фақат термометриядан ўтишлари ва анкета тўлдиришлари керак, холос.
Польша, Ўзбекистон, Тожикистондан келганйўловчиларманфий ПЦР-тести олганига беш кундан ортиқ бўлмаган мамлакатлар қаторига киритилди. Агар бу каби маълумотнома бўлмаган тақдирда учиб келганидан кейин 48 соат давомида йўловчилар келган жойида (хорижликлар), яшаш жойида (Қозоғистон фуқоролари)ПЦР-тестидан ўтишлари керак ёки 14 кун муддатда уй карантинида бўлишлари лозим.
Худди шу каби талаблар мунтазам авиарейслар бўлмагани боис эвакуацион ёки чартер рейслар амалга оширилган мамлакатларга ҳам қўйилган.
Аввалроқ, Қозоғистон Авиация расмийларининг хабар беришича, Қозоғистон шу ҳафтадан бошлаб БАА, Беларусь, Германия, Нидерландия, Миср, Украина ва Россияга ҳалқаро парвозларни қайта тиклайди. Июль ойи бошларида Туркия расмийлари Анталияга амалга оширилган авиарейснинг тўрт йўловчисида коронавирус аниқланганидан сўнг Қозоғистон фуқороларининг мамлакатга киришини чеклаб қўйди. Қозоғистон расмийларининг мамлакатдаги эпидемиологик вазият барқарорлашгани борасидаги ишонтиришларидан сўнг Туркия расмийлоари баёнот бериб, Туркия ва Қозоғистон ўртасидаги авиақатновлар 1 сентябрдан қайта тикланиши режалаштирилаётгани ҳақида баёнот берди.
Қайд қилинаётган COVID-19 билан боғлиқ янги ҳолатларнинг камайиб бориши фонида Қозоғистон расмийлари 5 июлда жорий қилинган карантин чораларини юмшатиш борасида қарор қабул қилди.17 августдан бошлаб мамлакатда айрим савдо ва хизмат обьектларининг, жумладан савдо марказлари, гўзаллик салонларининг фаолияти чекланган ҳолатда ишлашига рухсат берилди. Бу чоралар дам олиш кунларига жорий қилинмайди.
Шу йилнинг март ойидан бери мамлакатда лаборатия жиҳатдан 102 696 та коронавирусга чалиниш ва 1 397 та ўлим қайд қилинди. Бундан ташқари августнинг илк 15 кунида Қозоғистонда 18 465 та зотилжам вируси билан боғлиқ касаллик ва 216 та ўлим аниқланди. Соғлиқни сақлаш вазирлиги зотилжам касаллиги ва ўлим холатларини «коронавирус инфекцияси эҳтимоли бўлган» касалликлар статистикасига киритади, ҳамда бу борадаги статисткани августдан бошлаб юрита бошлади.
