Қирғизистоннинг собиқ бош вазири Николай Танаев узоқ давом этган ҳасталикдан сўнг 75 ёшида Россияда вафот этди. Бу ҳақда Азаттиқ радиосига собиқ бош вазирнинг қариндошлари хабар беришган.
У Россиянинг Санкт-Петербург шаҳрида дафн этилади.
Николай Танаев 2002 йил 30 майдан 2005 йилнинг 24 мартигача Қирғизистон Бош вазири бўлган. У март воқеаларидан сўнг ўша пайтдаги президент Асқар Ақаев ҳокимияти қулаганидан кейин истеъфога чиқиб Россияга қочиб кетган.
2003 йилда Николай Танаев ҳукумати томонидан имзоланган Қумтўр шартномасида Қирғизистон манфаатлари ҳимоя қилинмаганлиги айтилади. Собиқ Бош прокурор Азимбек Бекназаров шартномани имзолаган Николай Танаевга қарши жиноий иш очилганини айтган. Аммо, ушбу жиноий ишларнинг натижалари номаълумлигича қолган.
Танаев Қирғизистондан кетганидан кейин Россияда «Газпромнефт» компаниясида фолият олиб борган.
