Ўзбекистонга келин бўлган 80га яқин қирғизистонлик аёл Қорасув туманидаги «Дўстук» божхона назорат бекатидан ўта олишмай турибди. Улар орасида ҳомиладорлари ва ёш болалик келинлар ҳам бор. Бу ҳақда “Турмуш” нашри ёзмоқда.
Жалолобод вилояти, Сузоқ туманида туғилиб, Тошкентга келин бўлган Ирода Жўрабоева 2 боласи билан уч кундан буён ушбу божхона назорат бекатида кун кечирмоқда.
«Мен Ўзбекистондан ота-онамнинг уйига март ойининг бошида меҳмондорчиликка келган эдим. Кутилмаганда пандемия бошланиб, қайта уйимга қайта олмадим. Уч ойдан буён Қирғизистондамиз. Икки фарзандим отасини соғиниб, йиғламоқда. Икки давлат раҳбарларидан илтимос қиламиз, бизни Ўзбекистонга ўтказиб юборишсин. Болаларимиз қийналди», – деди Ирода Жўрабаева.
8 фарзанднинг онаси Раҳимахон Жураева ҳам 10-марттан буён Наманган шаҳрига кета олмаётганини маълум қилди. У фарзандлари ва турмуш ўртоғи Ўзбекистонда қандай кун кечираётганини ўйлаб, сарсон бўлаётганини айтди.
«Мен Ўзбекистондан 10-мартда келганман. Мана шу коронавирус бошланганидан буён бу ерда овора бўлиб юрибман. Наманганга кетишим керак. 60 ёшдаман. Ўзбекистонда турмуш ўртоғим ва 8 нафар фарзандим кутишмоқда. Турмуш ўртоғим 65 ёшда. Уни ким қараяпти экан? Шавкат Мирзиёев бизга ёрдам беринг, ўз уйимизга бориб, фарзандларимиз оиламиз даврасида ўтирайлик », – деди Р.Жўраева.
Давлат чегара хизматининг матбуот хизмати 23-май куни Қорасув туманидаги «Дўстук» божхона назорат бекатидан 50 нафар фуқаро Ўзбекистонга ўтказилганини маълум қилган эди. Уларнинг айримлари ўзбекистонлик фуқароларга турмушга чиққан қирғизистонлик келинлар бўлса, баъзилари эса Қирғизистонга келин бўлган ўзбекистонлик аёллар эди.
