Ўш шаҳридаги дўконлардан бирининг ходими болали аравачада келган аёлни савдо залига киритмагани билан боғлиқ можародан сўнг ишдан бўшатилди. Ҳодиса юзасидан шаҳар муниципал инспекцияси текширув ўтказиб, дўкон раҳбариятига огоҳлантириш берди.
Текширувга ижтимоий тармоқларда тарқалган видео асос бўлди. Унда Ўш шаҳрида яшовчи аёл «Умут» дўкони маъмури уни кичик фарзанди ўтирган аравача билан савдо залига киритишга рухсат бермагани, шунингдек, аравачани кириш қисмида қолдиришга ҳам йўл қўймаганини айтган.
Ўш шаҳар муниципал инспекцияси бошлиғи Нурсултан Шакир уулу 24.kg нашрига маълум қилишича, видео эълон қилинганидан сўнг инспекция ходимлари воқеа жойига бориб, дўкон жамоаси билан профилактик суҳбат ўтказган.
«Биз раҳбариятга огоҳлантириш бердик ва мижозларга бундай муносабатга йўл қўйиб бўлмаслигини тушунтирдик. Шунингдек, ҳаракатланиши чекланган фуқаролар учун шароит яратиш, жумладан, кириш қисмига пандус ўрнатиш зарурлигини кўрсатдик. Бу йўналишдаги тушунтириш ишлари давом эттирилади», — деди у.
Нурсултан Шакир уулунинг сўзларига кўра, муниципал инспекция аралашувидан кейин дўкон раҳбарияти ташриф буюрган аёлга қўпол муносабатда бўлган ходимни ишдан бўшатишга қарор қилган.
