Қирғизистонда йўқолиб кетиш хавфи остида бўлган ҳайвонлар ва ўсимликларнинг ҳолатини қайта баҳолаш учун Қизил китоб янгиланади.
Шу муносабат билан Табиий ресурслар вазирлиги ва Миллий фанлар академияси қўшма лойиҳани ишга тушириб, мамлакатнинг барча худудларида кенг кўламли илмий тадқиқотларни бошлайди.
Икки йиллик иш давомида мутахассислар ноёб ҳайвонлар, қушлар, балиқлар, судралиб юрувчилар ва ўсимликларнинг сони ва тарқалиш майдонини ўрганиб, уларнинг ҳозирги ҳолати ҳақида аниқ маълумот тўплайдилар.
Лойиҳани амалга ошириш учун тахминан 21 миллион сом ажратилди. Тадқиқот натижалари нашр этиладиган янги Қизил китобнинг илмий асосини ташкил қилади.
Ҳозирда Қирғизистоннинг Қизил китобига 57 турдаги қуш, 23 турдаги сутэмизувчи, 8 турдаги судралиб юрувчи, 7 турдаги балиқ, 18 турдаги артропод ва 89 турдаги ўсимлик ва замбуруғлар киритилган.
