18 май куни Бишкекнинг Биринчи май туман судида Миллий хавфсизлик давлат қўмитаси (МХДҚ)нинг собиқ раиси Қамчибек Ташиев бошчилигидаги саккиз кишига оид иш бўйича дастлабки суд муҳокамаси бошланди.
Ички ишлар вазирлиги (ИИВ) жиноят ишини тергов қилиб тугатиб, Бош прокуратура айблов хулосасини тасдиқлагандан кейин иш туман судига юборилди. ИИВ ишга “махфий” деган гриф қўйгани сабабли суд мажлислари ёпиқ тарзда ўтади.
Адвокат Ақинбек Ногоевнинг сўзларига кўра, ушбу иш бўйича Қамчибек Ташиев, Жогорку Кенешнинг собиқ спикери Нурланбек Тургунбек уулу ва собиқ депутат Қурманқул Зулушевга Жиноят кодексининг “Хизмат ваколатини суиистеъмол қилиш” ҳамда “Ҳокимиятни куч билан босиб олиш” моддалари бўйича айб қўйилди.
Президентлик сайловини жорий йил ўтказиш ҳақидаги хатда номи тилга олинган жамоат арбоби Бекболот Талгарбековга, Қирғизистоннинг Ўзбекистондаги собиқ элчиси ва собиқ қишлоқ хўжалиги вазири Эмилбек Узақбаевга, Жогорку Кенешнинг собиқ депутати Қурманбек Дийқанбаевга, собиқ вице-премьер ва экс-депутат Аали Карашевга ҳамда Ички ишлар вазирининг собиқ ўринбосари Курсан Асановга “Хизмат ваколатини суиистеъмол қилиш” моддаси бўйича айб эълон қилинди.
9 февраль куни собиқ бош вазирлар, парламентнинг экс-депутатлари, сиёсатчилар ва жамоат арбобларидан иборат 75 кишилик гуруҳ президент Садир Жапаров ва Жогорку Кенешнинг ўша пайтдаги раиси Нурланбек Тургунбек уулуга мурожаат қилиб, яқин вақт ичида президентлик сайловини ўтказишга чақирган. Кейинроқ уларнинг айримлари мурожаат мазмунини ўқимасдан туриб унга қўшилишга рози бўлганини айтишган.
Ички ишлар вазирлиги ушбу мурожаат бўйича жиноят иши қўзғатиб, Бекболот Талгарбеков, Эмилбек Узақбаев, Қурманбек Дийқанбаев, Аали Карашев ва Курсан Асановни қўлга олган. Улар ҳозирда қамоқда.
10 февраль куни Садир Жапаров Қамчибек Ташиевни Вазирлар маҳкамаси раиси ўринбосари — Миллий хавфсизлик давлат қўмитаси раиси лавозимидан озод қилган. Кейинги интервьюларида у Жогорку Кенешда депутатлар “президент томони” ва “махсус хизмат томони”га бўлиниш бошланганини, кейинчалик бундай ҳаракат парламент ташқарисига ҳам чиққанини айтиб, 75 кишининг мурожаатини мисол келтирган.
Бу воқеалардан кейин Нурланбек Тургунбек уулу аввал спикерлик лавозимини тарк этди, сўнг депутатлик мандатини ҳам топширди. У Facebook саҳифасида пост ёзиб, 75 кишининг мурожаатига алоқаси йўқлигини билдирган.
Президент Садир Жапаров сўнгги интервьюсида 75 кишининг мурожаатига Қамчибек Ташиевнинг алоқаси бор-йўқлигини тергов ва суд аниқлаб, ҳуқуқий баҳо беришини айтган. Собиқ хавфсизлик раҳбари эса ўзини айбсиз деб ҳисоблашини ва судда оқланишини билдирган.
“75чиларнинг хати” Жогорку Кенешга келиб тушган пайтда Қурманқул Зулушев парламентнинг Конституциявий қонунлар, давлат тузилиши, маҳаллий ўзини ўзи бошқариш ва Жогорку Кенеш регламенти бўйича қўмитаси раиси бўлиб турган.
