Бишкек шаҳридаги Ленин туман суди 23 март куни Temirov LIVE ва «Айт, айт десе» медиа-лойиҳалари раҳбари Махабат Тажибек қизини колониядан озод қилиш тўғрисида қарор қабул қилди. У икки йилдан ортиқ вақт давомида қамоқда сақланаётган эди. Бу ҳақда АКИpress нашри Бишкек шаҳар суди матбуот хизматига таяниб хабар берди.
Унинг турмуш ўртоғи Болот Темировнинг айтишича, Тажибек қизи мамлакатни тарк этмаслик тўғрисидаги тилхат асосида озод қилинган. Суд мажлисида журналист онлайн тарзда иштирок этган. Адвокат Акинбек Ногоевнинг билдиришича, у ўша куниёқ озодликка чиқарилади.
«Мижозимга нисбатан эҳтиёт чораси ўзгартирилди. Ҳозир биз Степное қишлоғига (у ерда аёллар колонияси жойлашган) борамиз ва кейин судга қайтамиз, шунда Тажибек қизи кўрсатма бериши мумкин», — деди Ногоев.
2026 йил 10 март куни Олий суд иш материалларини янги очилган ҳолатлар асосида қайта кўриб чиқиш учун Ленин туман судига юбориш тўғрисида қарор чиқарган ва аввалги икки суд инстанциясининг қарорларини бекор қилган.
ℹ️ Махабат Тажибек қизи — журналист ва Temirov LIVE лойиҳаси раҳбари, суриштирувчи журналист Болот Темировнинг турмуш ўртоғи. Улар биргаликда коррупцияга оид, жумладан нефть-газ соҳасидаги маблағ талон-торожлиги ҳақидаги суриштирувлар устида ишлаган. Бу ишлар катта жамоатчилик резонансига сабаб бўлган. Шундан кейин Болот Темиров Қирғизистондан чиқариб юборилган ва фуқаролигидан маҳрум қилинган.
ℹ️ Temirov LIVE лойиҳасининг 11 нафар ходими ўтган йил 16 январь куни қўлга олинган. Улар оммавий норозилик намойишларига ва тартибсизликларга чақиришда айбланган. Аввалига барчасига икки ойлик қамоқ эҳтиёт чораси белгиланган — 13 мартгача. Кейин суд уларнинг етти нафарини уй қамоғига ва мамлакатни тарк этмаслик тўғрисидаги тилхат билан озод қилган. Тергов изоляторида эса Тажибек қизи, «Айт Айт Десе» акыны Азамат Ишенбеков, журналистлар Актилек Капаров ва Айке Бейшекеева қолган.
2024 йил 10 октябрь куни суд Тажибек қизини 6 йилга, Ишенбековни эса 5 йилга озодликдан маҳрум қилишга ҳукм қилган. Капаров ва Бейшекееева 3 йиллик пробация жазосини олган. Иш бўйича қолган айбланувчилар эса жиноят таркиби йўқлиги сабаб оқланган.
