Вазирлар Маҳкамаси махсус иш шароитлари ва қисқартирилган иш вақтига эга ходимларнинг янгиланган рўйхатини тасдиқлади.
Ҳужжатга кўра, ишнинг ўзига хос хусусиятлари ва касбий хавф даражасига қараб, айрим ходимлар учун иш куни 5 ёки 6 соат қилиб белгиланди.
Қисқартирилган иш вақти қуйидаги соҳалардаги ходимлар учун тақдим этилади:
• юқумли, сил касаллиги ва руҳий касалликларга чалинган беморлар билан ишлайдиган тиббиёт ходимлари;
• реабилитация марказлари, физиотерапия хоналари ва патологик анатомик хизматлар ходимлари;
• тез тиббий ёрдам станциялари, қон марказлари ва лабораториялар ходимлари;
• дорихоналар ва фармацевтика саноати мутахассислари;
• суд экспертлари;
• радиоактив моддалар ва нурланиш манбалари билан ишлайдиган ходимлар;
• ижтимоий муассасалар, интернат мактаблари ва болалар муассасалари ходимлари.
Ўта хавфли шароитларда ишлайдиган айрим тоифадаги ишчилар учун иш куни 5 соат қилиб белгиланди.
Янги қарор 2008 ва 2010 йилларда қабул қилинган аввалги иккита ҳукумат қарорини бекор қилади.
