Бугун Ўш шаҳар мэри Женишбек Токторбаев эрталабки рейд доирасида 6-сонли Макаренко ўрта таълим муассасасига ташриф буюрди. У мактаб ҳудудидаги ноқонуний қурилишларни кўздан кечирди. Бу ҳақда мэриядан хабар қилишди.
Маълумки, 2008 ва 2012 йилларда таълим муассасасига тегишли бир қатор ер участкалари хусусийлаштирилган. Ҳозирда ушбу ҳудудларда банклар, дўконлар ва ошхоналар каби тижорат объектлари фаолият юритмоқда.
Женишбек Токторбаев тегишли раҳбарларга хусусий мулкка ўтказилган ижтимоий объектларнинг ерларини шаҳар мулкига қайтариш бўйича ишларни давом эттиришни буюрди.
Шуни таъкидлаш керакки, шаҳар мэри илгари хусусий шахсларга ўтказилган шаҳардаги мактаб ва болалар боғчаларига тегишли ер участкаларини шаҳар мулкига қайтариш бўйича қатъий талаб қўйиб келмоқда. Бугунги кунга қадар бир нечта таълим муассасалари ҳудудлари қурилишдан озод қилинди ва бу йўналишдаги ишлар келгуси йилда янада кучайтирилади.
