Қирғизистоннинг Иссиқкўл вилоятида ваҳшийона тарзда ўлдирилган 17 ёшли Айсулуу Мукашеванинг ўлимида гумон қилинаётган шахсга зўравонлик билан боғлиқ жами 7 та жиноят бўйича айблов қўйилган. Бу ҳақда “ЭлТР” телеканали ҳуқуқни муҳофаза қилувчи органлар билан ҳамкорликда олиб борган журналистик суриштирувда маълум қилинди.
Унда айтилишича, тўртта қиз зўрланиб ўлдирилган, иккита қиз тирик қолган, яна бирининг тақдири номаълум.
Гумонланувчи бир қиз бошига арматура билан уриб, талончилик қилган. Яна бир қизни такси билан олиб кетаётган пайтда пичоқ билан қўрқитиб, қўлини боғлаб, зўрлашга ҳаракат қилган. Қиз боғини ечиб, пичоқни тортиб олиб, жиноятчининг қўлини кесиб юборган. Шу пайт жиноятчи қизни тош билан уриб, воқеа жойидан қочиб кетган. Қиз омон қолиб, милицияга мурожаат қилган.
Бу ҳолатлар бўйича гумонланувчи ҳибсга олинган, аммо терговда суд органлари уни енгил жазо билан озод қилгани айтилган.
Суриштирувда, шунингдек, гумонланувчининг 2014 йил 16 март куни Бишкек шаҳри четидаги Байтик қишлоғидан топилган Камила Дуйшобаева номли қизнинг ўлимига ҳам алоқаси борлиги маълум бўлган.
Қотиллик қурбони бўлган Айсулуу Мукашева жорий йилнинг 27 сентябрь куни Иссиқкўл вилоятининг Жети-Ўғуз туманидан Қаракол шаҳрига дугонасининг уйига кетиб, бедарак йўқолган.
Ички ишлар вазирлигининг маълумотига кўра, уни Барскон қишлоғида 41 ёшли гумонланувчи Honda Stream русумли автомобилга ўтқазиб олиб кетган ва Жениш қишлоғида зўрлаган. Сўнгра Тон туманидаги Кажи-Сой қишлоғи шарқий қисмидаги ҳовуз ёнига олиб бориб, ваҳшийона тарзда бўғиб ўлдирган. Кейин қизнинг жасадини Чуй вилоятининг Кемин туманидаги Жел-Артиқ автомобили йўлининг 14-чақиримига, яъни Боом довонида ташлаб юборган.
Гумонланувчи жиноятини яшириш мақсадида машинасини ювиб-тозалаб ташлаб кетган, мобил телефони ва SIM-картасини йўқ қилган. Уни Ички ишлар вазирлигининг Жиноят қидирув бош бошқармаси ва Жети-Ўғуз тумани милицияси ходимлари Бишкек шаҳрининг кичик туманларидан бирида яшириниб юрган жойидан қўлга олган.
Ички ишлар вазирлиги гумонланувчининг илгари ҳам бир неча бор судланган шахс эканини, ҳозирда эса у Жети-Ўғуз тумани ички ишлар бўлими вақтинчалик сақлаш изоляторида эканини маълум қилган.
