Россиянинг бир қатор қонунларида миграция талаблари кучайтирилади. Бу ҳақда Ташқи ишлар вазирлиги Консуллик департаменти директори ўринбосари Бакит Кадиров маълум қилди.
Унинг сўзларига кўра, “Крокус Сити Холл”даги воқеадан сўнг Россия чет элдан келаётган муҳожирларнинг террорчилик ҳаракатларининг олдини олиш мақсадида бир қатор миграция қонунчилигига ўзгартиришлар киритмоқда.
«8 август куни мигрантларни мамлакатдан чиқариш тартибининг янги ҳуқуқий режимини жорий этиш тўғрисидаги қонун имзоланди. Бу Россияда қолиш учун қонуний асосга эга бўлмаган хорижликларга нисбатан қўлланилади. Агар мигрантни депортация қилиш режими қўлланилса, у назоратга олинган шахс қатори тегишли реестрга киритилади. У Россиянинг ички ишлар органларига юрган жойи, мамлакатдан ўз вақтида ва ўз хоҳиши билан чиқиб кетиши сабаблари тўғрисида маълум қилишга мажбур бўлади. Бундан ташқари, хорижлик Россия Федерацияси Ички ишлар вазирлигининг минтақавий органига рухсатсиз яшаган ерини ўзгартириш тўғрисида хабар бериши, мамлакатдан чиқиб кетиш вақти, жойи ва йўналиши тўғрисида маълумот тақдим этишга мажбур.
Реестрга киритилган чет эл фуқароларига нисбатан бир қатор чеклов чоралари қўлланилади. Масалан, унга ички ишлар органининг рухсатисиз Россияда яшаш жойини ўзгартириш таъқиқланади. Шунингдек, хорижий транспорт воситаларини бошқариш мумкин эмас. Унга имтиҳон топшириб, Россиянинг миллий ёки халқаро ҳайдовчилик гувоҳномасини олиш мумкин эмас. Агар чет эл фуқароси ўз зиммасига юкланган вазифаларни бир неча марта, икки ёки ундан кўп марта бажармаган бўлса, депортация қилинади ёки махсус муассасага жойлаштирилади”,-деди у.
Шунингдек, у чекловчи чоралар 2025 йил 5 февралдан кучга киришини қўшимча қилди.
«Бироқ, бунгача Россия ҳудудида қонуний асоссиз бўлган ва умуман мамлакатни тарк этмаган хорижликлар назорат остидаги шахслар реестрига киритилади. Ташқи ишлар вазирлиги 2025 йил 1 январдан бошлаб чет элликларнинг Россияда вақтинча бўлиш муддатини йилига 180 кундан 90 кунгача қисқартириш қоидаси кучга киришини эслатиб ўтди. Мен ушбу қоидалар Россия ҳудудида тегишли рухсатнома ҳужжатларига эга бўлмаган чет элликларга ҳамда унинг ичида бизнинг қирғизистонликларга ҳам тегишли эканлигини таъкидламоқчиман”,- деди у.
