Қирғизистон Республикаси Миллий хавфсизлик давлат қўмитаси Чегара хизмати 29 август куни Қирғизистон ва Қозоғистон чегарасидаги назорат-ўтказиш пунктларида юкр автомобиллар навбати кузатилмаганини маълум қилди.
Назорат пунктлари нормал режимда ишлаётгани айтилмоқда.
Вазият 28 августдан бери яхшиланмоқда. Бир кун аввал «Оқ-Тилак» назорат-ўтказиш пунктида навбат ҳосил бўлиб, унда 140 та юк автомобили тизилган. 29 август ҳолатига кўра, ҳеч бир назорат-ўтказиш пунктида навбат йўқлиги айтилмоқда.
20 августдан бошлаб Қирғизистон ва Қозоғистон чегарасидаги «Оқ-Тилак» назорат-ўтказиш пунктида юк машиналари тўпланиб қолгани ҳақида хабарлар кела бошлади. Чегара хизмати ҳар куни навбат ортгани ҳақида хабар берди. 23 август куни «Кен-Булун» назорат-ўтказиш пункти олдида ҳам юк машиналари тўпланиб қолгани маълум бўлди. 24 август куни тўртта: Оқ-Тилак, Чалдибар, Кен-Булун ва Чўн-Капка ўтказиш пунктларида навбатлар кузатилди.
Шунингдек, 24 август куни Евросиё иқтисодий комиссияси делегацияси вазиятни ўрганиш учун Қирғизистон ва Қозоғистон чегарасига етиб келди. Қирғизистон Иқтисодиёт ва савдо вазирлиги Қозоғистоннинг хатти-ҳаракатлари ЕОИИ шартномасига зид эканлигини ва иттифоқ доирасида товарларнинг ҳаракатланиш эркинлигини чеклашини айтди.
Ўз навбатида Қозоғистон Чегара хизмати ҳеч қандай чекловлар йўқлигини маълум қилди ва “ноқонуний фаолиятга қарши курашиш бўйича комплекс чора-тадбирлар амалга оширилаётганини” маълум қилди.
26 август куни Қозоғистон президенти Қосим-Жомарт Тўқаев мамлакат ҳукуматига икки давлат чегарасидаги вазиятни тартибга солиш бўйича топшириқ берган эди.
