Россия президенти Владимир Путин қайта ишлаш саноати корхоналари раҳбарлари билан учрашуви чоғида «мамлакатнинг барча мансабдорлари Россияда ишлаб чиқарилган автомобилларда юриши шартлиги»ни айтди. Путиннинг бу нутқи видеоси Россия ОАВларида эълон қилинди.
«Вазирликлар, ташкилотлар ва иш бошқармалари хориждан автомобил сотиб олишда давом этишни илтимос қилмоқда. Мен бунга йўл қўмаслик кераклигини ва мамлакатнинг барча мансабдорлари ўзимизнинг автомобилларда юриши шартлигини айтдим», – деди Путин.
Россия Украинага бостириб кирганидан сўнг Hyundai, Toyota (Lexus), Skoda Auto, Renault, Mercedes-Benz ва бошқа ширкатлар Россиядаги ишлаб чиқариш фаолиятини тўхтатган эди. General Motors, Mercedes-Benz, BMW, Ford, Land Rover, Toyota ва Mazda Россияга ўз маҳсулотларини сотмай қўйди.
Июнь ойида Европа Иттифоқи Россияга электр ва гибрид машиналарни, люкс русумидаги янги ва эски автомобилларни экспорт қилишни тақиқлаган. Июлда Япония ҳам Россияга двигатели ҳажми 1,9 кубдан юқори бўлган автомобилларни сотишни тўхтатди.
Association of European Business ташкилотининг билдиришича, 2022 йилда Россия автомобил бозори 58,8 фоизга қисқарган. Ўтган йили Россияда 687 370 автомобил сотилган. 2021 йилда бу кўрсаткич 1,7 миллионни ташкил қилган эди.
