Германия ва Нидерландияда 6 июль куни полиция террор уюштиришни режалаштирганликда гумонланган Қирғизистон, Тожикистон, Туркманистон фуқароларини қўлга олди.
Reuters агентлигининг Германия Бош прокуратурасига таяниб хабар беришича, 6 июльда “Ислом давлати” террор гуруҳига ўхшаган ташкилот тузишда гумонланган етти киши ушланган. Уларнинг бир нафари қирғизистонлик, бир нафари туркманистонлик ва беш нафари тожикистонликдир. Шимолий Рейн-Вестфалияда қўлга олинган бу шахслар бир-бирлари билан яқиндан таниш бўлган ва 2022 йилда Россия босқини бошланганидан сўнг Украинадан Германияга келган.
Бош прокуратура маълумотида қайд этилишича, улар 2022 йилдан террор ташкилоти тузиш ҳаракатини бошлаган ҳамда қурол излашган. Шунингдек, қўлга олинганлар 2022 йилнинг апрелидан бошлаб “Ислом давлати” террор ташкилотига молиявий ёрдам кўрсатиб келган.
Шу куни Нидерландия прокуратураси “29 ёшли тожикистонлик ва унинг 31 ёшдаги қирғизистонлик хотини террорчиликни режалаштирганликда гумонланиб қўлга олингани” ҳақида билдирди.
Хабарда айтилишича, ўтган йилдан бери Нидерландияда яшаб келаётган тожикистонлик “Ислом давлати” гуруҳига мансубликда ҳам гумонланмоқда. Полиция “мазкур шахс теракт уюштиришга буюртма олгани ва тайёргарлик кўриб келгани”ни маълум қилди. Нидерландияда ушланганлар Германияда қўлга олинган гуруҳ билан алоқада бўлган.
Қирғизистон, Тожикистон ва Туркманистон ҳукуматлари бу хабарга ҳозирча муносабат билдирмади.
