Қирғизистон Республикаси Иқтисодиёт ва савдо вазирлиги ҳузуридаги Давлат мулкини бошқариш жамғармаси (ДМБЖ) “Альфа Телеком” ЁАЖнинг (Мега савдо белгиси) 100 фоиз давлат улушини сотиш бўйича электрон аукцион ўтказди.
Департамент расмий сайтидаги маълумотларга кўра, лотнинг бошланғич қиймати 14,6 миллиард сомни (Қирғизистон Республикаси Миллий банкининг 4 июлдаги курси бўйича тахминан 167 миллион 220 минг доллар – таҳр.) ташкил этади. Давлат мулки жамғармаси хабарида таъкидланишича, электрон аукционда иштирок этиш учун аризаларни қабул қилиш аллақачон бошланган ва улар 2 октябр соат 10:00 га қадар қабул қилинади ва шу куни соат 16:00 да аукцион амалга оширилади.
Кимошди савдосида иштирок этишни хоҳловчилар – жисмоний ва юридик шахслар объект бошланғич қийматининг 10 фоизи, яъни 1 миллиард 460 миллион сом миқдорида кафолат йиғими тўлашлари керак. Ва ғолиб ДМБЖга компаниянинг сотиш нархининг 7% ни ташкил этадиган комиссия тўловини тўлаши шарт.
Давлат мулки жамғармаси маълумотларига кўра, “Альфа Телеком”нинг абонент базаси 1 июнь ҳолатига кўра 2,5 миллиондан ортиқ абонентни ташкил этади. Жамиятнинг давлат қимматли қоғозлари пакети жами 8 миллион 700 минг 100 дона акцияга эга.
Эслатиб ўтамиз, март ойида ПолитКлиника ахборот нашри Альфа Телекомнинг Қирғизистон Республикаси Давлат тараққиёт банкига сотилиши мумкин бўлган шубҳали ҳолатлар бўйича текширувни эълон қилган эди. Нашр Қирғизистон Республикаси собиқ президенти Қурманбек Бакиевнинг ўғли Максим Бакиевнинг яқин шериклари Мега устидан назоратни қўлга олмоқчи, деган версияни илгари сурди.
Шу муносабат билан Жогорку Кенеш депутати Жанарбек Акаев Қирғизистон Республикаси Бош прокурорига ушбу масалани текширишни таклиф қилди ва компаниянинг 14,6 миллиард сомлик тахминий қийматини кам баҳоланган деб ҳисоблашини маълум қилди. Бунга жавобан Қурманқул Зулушев вазиятни ўрганишга ваъда берди.
Бунгача Президент матбуот котиби Эрбол Султонбоев уяли алоқа оператори давлат юрисдикциясида қолиб, шахсий қўлларга ўтмаслигига ишонтирган эди.
