“Қумтор Оперейтинг компани” ёпиқ ҳиссадорлик жамияти акцияларининг юз фоизи Қирғизистон ҳукумати ихтиёрига ўтказилди. Бу ҳақда Министрлар кабинети 25 март куни қарор чиқаргани тўғрисида ҳукумат матбуот хизмати маълум қилди.
Расмий билдирувда таъкидланишича, ҳукумат қатор инвестициявий лойиҳаларни амалга оширишни режалаштирмоқда. Мазкур лойиҳалар “Қумтор Оперейтинг компани” орқали амалга оширилади. Шунинг учун ҳам ширкат акцияларини тўлиғича ҳукумат тасарруфига олишга қарор қилинган. Қарорга асосан Давлат мулкини бошқариш агентлиги олтин конининг ягона акционери бўлиб қолади.
“Қумтор” олтин конини ўзлаштириш бўйича Қирғизистон ҳукумати 1992 йилда Канаданинг “Камеко” ширкати билан шартнома имзолаган эди. 1996 йилдан конда олтин қазиб олиш бошланган. Қирғизистон конни “Қумтор Оперейтинг компани” орқали Канаданинг “Центерра Голд” ширкати билан ҳамкорликда бошқариб келган.
2021 йил майида ҳукумат конни тўлиқ Қирғизистон ихтиёрига ўтказиш тўғрисида қарор чиқарган ва 2022 йилда ширкат акцияларининг юз фоизи “Қирғизолтин” ширкатига берилган эди. Дастлаб Қирғизистонни бу қарор учун судга берган “Центерра Голд” кейинроқ ўзининг барча даъволаридан воз кечган.
