Қирғизистон ва Тожикистон чегара вакиллари чегарадаги воқеадан сўнг учрашув ўтказди. Бу ҳақда Қирғизистон Миллий хавфсизлик давлат қўмитаси (МХДҚ) чегара хизмати матбуот хизмати хабар берди.
Қайд этилишича, йиғилишда Ички ишлар вазирлиги ва Миллий хавфсизлик давлат қўмитасининг ҳудудий бошқармалари раҳбарлари ҳам иштирок этган.
“Музокаралар чоғида томонлар Қирғизистон ва Тожикистон аҳолиси ўртасидаги муштлашув тафсилотларини ўрганиб, провокациялар ва вазият кескинлашувининг олдини олишга келишиб олдилар. Муштлашув факти Ички ишлар вазирлигининг ҳудудий органлари томонидан ўрганилади, ушбу ҳудудга ИИВнинг қўшимча бўлинмалари юборилади”, — дейилади Чегара хизмати хабарида.
Аввалроқ 3 декабрь куни тушдан кейин Қирғизистон-Тожикистон чегарасидаги Боткен туманининг Кўк-Тош қишлоғида маҳаллий аҳоли ўртасида можаро содир бўлгани хабар қилинганди.
Миллий хавфсизлик давлат қўмитаси Чегара хизматининг хабар беришича, Сомониён қишлоғи орқали Дахма қишлоғи томон кетаётганда Қирғизистон фуқароси билан Тожикистон фуқаролари ўртасида отишма содир бўлган. Можаро жанжал ва тош отишга айланган. Чегара хизмати маълумотларига кўра, Қирғизистон фуқароси ов қуролидан фойдаланиб, ҳавога уч марта огоҳлантирувчи ўқ узган.
Боткен тумани ҳокими Учқунбек Жўробоевнинг айтишича, ҳодиса натижасида Қирғизистон фуқароси Нурсултон Сайфулло уулу тан жароҳати олиб, шифохонага етказилган.
Тожикистон расмий идоралари ҳозирча вазиятга изоҳ бермаган. Бироқ Тожикистоннинг Сомониён қишлоғи аҳолиси Озодликнинг тожик нашрига воқеа ҳақидаги маълумотни тасдиқлади. Маълум қилинишича, ушбу қишлоқда яшовчи 21 ёшли Хизбулло Оқилзода тан жароҳати олиб шифохонага ётқизилган. Отасининг сўзларига кўра, ўғли арматура билан урилган.
Ўтган ой Қирғизистон президенти Садир Жапаров ҳукумат чегара муаммоларини йил охиригача ҳал қилишни режалаштираётганини айтган эди. Қирғизистон Миллий хавфсизлик давлат қўмитаси раиси Қамчибек Ташиев ҳам Тожикистон билан чегараларни аниқлаштириш бўйича музокараларда муваффақиятга эришганини маълум қилди.
Қирғизистон ва Тожикистон ўртасидаги чегаранинг узунлиги 970 километр бўлиб, уларнинг 519 км.и аниқланган, қолганлари аниқланмаган. Қирғизистоннинг Боткен вилояти ва Тожикистоннинг Сўғд вилояти ўртасидаги участкалар мунозарали бўлиб қолмоқда, бу ерда икки давлат аҳолисининг қишлоқлари ва баъзан уйлари яқин жойда жойлашгани чегара чизиғини аниқлашни қийинлаштиради. Ушбу ноаниқлик туфайли қўшни давлатлар аҳолиси ва чегарачилар ўртасида сув, қуруқлик ва алоқа воситаларидан фойдаланиш ҳуқуқи учун тез-тез тўқнашувлар бўлади. Шу билан бирга, кўпинча қурол-яроғ қўлланилади, бу эса одамларнинг қурбон бўлишига олиб келади.
