Жалолобод вилояти Сузоқ тумани Сосиқ-Булоқ қишлоғида 21 ноябрь куни ўлдирилган қизнинг яқинлари қотилликда гумонланиб қўлга олинган маҳаллий фуқарога қарши митинг ўтказди.
Воқеа жойидан «Озодлик» мухбирининг хабар беришича, акцияда Бозорқўрғон туманидан келган 50 га яқин одам иштирок этган. Воқеа жойида ички ишлар ходимлари ҳам бўлган.
Намойишчилар гумонланувчини умрбод қамоқ жазосига ҳукм қилишни талаб қилишган, шунингдек, унинг оиласи яшаш жойини тарк этиши кераклигини билдирган.
Ҳокимият эътиборини тортиш мақсадида йиғилганлар Бишкек—Ўш йўлининг Сосиқ-Булоқ қишлоғи ҳудудидан ўтувчи қисмини тўсиб қўйишга уринган, бироқ 10 дақиқадан сўнг йўл очилган. Кейинроқ намойишчилар йўлни яна тўсиб қўйишган.
Қотиллик 8 ноябрь куни Ноокен вилоятида содир бўлган. Полиция маълумотларига кўра, 19 ёшли қизнинг жасади топилган. Аниқланишича, қиз Бозорқўрғон туманида яшаган. Унинг қотиллигида гумонланиб, 58 ёшли эркак ҳибсга олинган.
Мазкур ҳолат юзасидан Жалолобод шаҳар ИИБ, шунингдек, Ноокен, Бозорқўрғон ва Сузоқ туманлари ички ишлар бошқармаси ходимлари жалб этилган. Маълум қилинишича, гумонланувчи аввал зўрлаш ва бошқа жиноятлар учун бир неча бор судланган. Шунингдек, тергов давомида қўлга олинган шахс ўз айбига иқрор бўлгани ва воқеа жойида кўрсатма бергани маълум қилинди.
