Жогорку Кенешнинг 20 га яқин депутати президент Садир Жапаровга «Кампиробод иши» бўйича ҳибсга олинган аёлларни озод этиш талаби билан мурожаат йўллади.
Бу ҳақда Озодликка парламент депутати Дастан Бекешев хабар берди.
Депутатлар мурожаатида хотин-қизларнинг Қирғизистон маданиятида алоҳида тарихий ўрни борлиги, қамоқдаги фаоллар мамлакат тараққиётига катта ҳисса қўшгани таъкидланган.
“Сиздан шахсан иштирок этиш ва инсонпарварлик кўрсатишингизни, тегишли раҳбарлардан илгари қабул қилинган қарорларни қайта кўриб чиқишни ва бошқа шахслар қаторида ҳибсга олинган аёлларга нисбатан эҳтиёт чорасини ўзгартиришни талаб қилишингизни чин дилдан сўраймиз”, – деди депутатлар.
Мурожаатни имзолаганлардан бири, депутат Дастан Бекешев Озодликка берган интервьюсида ҳуқуқ-тартибот идоралари Кампиробод сув омборини қўриқлаш қўмитасининг ҳибсга олинган аъзоларининг айбига оид далиллар келтирмаганини айтди.
“Қўлга олинган аёлларнинг ҳибсда сақлаш муддати узайтирилиши кутилган эди. Бу ерда жиноий жавобгарлик йўқлигини таъкидлаш керак. Агар тергов органлари одамларни тартибсизликлар уюштиришга уринганликда гумон қилсалар, улар далил келтириши керак”, – деди Бекешев.
Ҳужжатни Дастан Бекешев, Сейид Атамбаев, Исхак Масалиев, Эмил Токтошев, Венера Раимбачаева, Гуля Кожоқулова, Жанар Акаев ва бошқа депутатлар имзолаган.
Октябрь ойида Бишкекда сиёсатчилар ва фаоллар оммавий ҳибсга олинган эди. Уларга нисбатан Қирғизистон Республикаси Жиноят кодексининг 36-278-моддаси (“Оммавий тартибсизликлар уюштиришга тайёргарлик кўриш”) билан қўзғатилган жиноят иши доирасида гумонланувчи деб эълон қилинди. Бишкек суди уларни икки ойга ҳибсга олди. Бу иш бўйича жами 26 киши ҳибсга олинган. Ҳибсга олинганлар орасида олти нафар аёл: МСК собиқ аъзоси Гулнора Жўрабоева, ҳуқуқ ҳимоячиси Рита Карасартова, Жогорку Кенеш собиқ депутати Асия Сасиқбоева, Конституциявий палатанинг собиқ судьяси Клара Сооронқулова, фаоллар Орозайим Нарматова ва Перизат Суранова бор.
Аввалроқ ҳуқуқ ҳимоячилари ва фуқаролик фаоллари орасидан 80 дан ортиқ киши ушбу иш бўйича ҳибсга олинганларни озод этиш талаби билан расмийларга мурожаат қилган эди. Хусусан, халқаро ташкилотлар вакиллари тергов изоляторидаги шароит қониқарли эмаслигини таъкидладилар.
