Давлат департаменти томонидан ўтказилувчи грин карта лотереясини ютиб, Америкада яшаш ҳуқуқини қўлга киритган, аммо АҚШга кетаолмаётган бир қатор давлатларнинг фуқаролари, президент Доналд Трамп ва давлат котиби Майк Помпеодан мамлакатга киришга рухсат беришни талаб қилмоқда. Бу ҳақда РИА Новости хабар беради.
Дунё бўйлаб АҚШ консулликлари фавқулодда ҳолатлардан ташқари, тожливирус пандемияси туфайли виза бермайди ёки интервью ўтказмайди. Бундан ташқари, Трамп апрел ойида бир қатор тоифадаги чет элликлар, шу жумладан грин карта лотереясини ютиб олган ва АҚШга бориш учун рўйхатга олишнинг турли босқичларида бўлганларни киритишни таъқиқлаган.
Грин карта ютиб, АҚШга боришга даъвогарлар орасида ўнга яқин Россия фуқаролари, Туркия фуқароларидан иборат йирик гуруҳ, шунингдек, Украина, Белорусия, Арманистон, Ўзбекистон, Қирғизистон, Тожикистон, Фаластин, Миср ва Сурия фуқаролари бор.
Қирғизистонлик Ўткирбек Абдумоминов грин-картани ютиб, АҚШга келган. У оиласининг келишига тайёргарлик кўришни бошлаган. Аммо унинг оиласи тожливирус чекловлари туфайли АҚШга бора олмаган, визаларининг муддати эса тугаган.
Грин карта лотереясини ютиб олган кўплаган инсонлар уйларини сотиб, ишларидан бўшаган. Бироқ уларнинг АҚШга сафари номаълум муддатга қолдирилган ва умуман амалга оширилмаслиги ҳам мумкин. Чунки лотерея ғолибларига Америкага кўчиб ўтиш учун чекланган вақт берилади, бу муддат эса тугамоқда.
Даъвогарлар, Трамп ва Помпеони ўз ваколатларини ошириб юборганликларини иддао қилиб, уларга қарши судга саккизта даъво аризасини беришга ҳозирланмоқда. Улар суддан Трампнинг айрим тоифадаги чет эл фуқароларининг АҚШга киришини чеклаб қўйган апрел ойидаги фармонини бекор қилиш, даъвогарларни суҳбатга, интервьюга чақириши, муддати ўтган визаларни қайта расмийлаштириш ва натижада грин карта соҳиблари ва уларнинг қариндошларини Америка ҳудудига кириш талабини қондиришни сўрамоқда.
