Бишкекда 11 август куни №2-йўналишдаги электробусда йўловчи аёллар ўртасида жанжал содир бўлди. Ҳодиса Аламедин бозори ҳудудида юз берган. Жанжал видеоси ижтимоий тармоқларда тарқалиб, жамоатчиликнинг катта муҳокамага сабаб бўлди.
Мазкур ҳолат юзасидан Свердлов тумани ички ишлар бошқармаси дастлабки терговга қадар текширув бошлади. Милицияга жанжал иштирокчиларидан икки нафари — 1963 йилда туғилган К.Ф. ва 1992 йилда туғилган П.А. олиб келинди.
Кейинчалик воқеа юзасидан Қирғизистон Жиноят кодексининг 280-моддаси («Безорилик») бўйича жиноят иши қўзғатилди.
Видео тарқалганидан сўнг жанжал иштирокчиларидан 63 ёшли аёл воқеа юзасидан ўз версиясини билдирди. Шунингдек, электробус салонига ўрнатилган кузатув камераларининг ёзувлари ҳам эълон қилинди. Кадрларда йўловчилар ўртасидаги жанжал нимадан бошлангани акс этган.
Унинг сўзларига кўра, у электробусга кирганида, салонда бир неча нафар нафақадаги одамлар турган бўлган. 34 ёшли аёл эса ўтириб, телефонига қараб кетган. Шунда у унга жой беришини сўраб танбеҳ берган.
«Мен унинг елкасига енгил тегиб: “Қизим, жой бер”, дедим. У ўрнидан туриб, норози ҳолда жой берди. Бир бекатдан кейин автобуснинг бошқа қисмида жой бўшади. Мен ўша ерга бориб ўтирдим. Яна бир-икки бекат юрдик. Кейин у менинг олдимга келди. Бироз вақт ўтгач, қарасам, у ёнимда туриб мени телефонга тасвирга оляпти. Бу ўша йўловчи аёл эди», деди нафақадаги аёл.
Шундан сўнг у ёш аёлни унга ҳужум қилганлик ва ҳақорат қилганликда айблади.
