Эрон давлат оммавий ахборот воситалари 28 июль куни жорий йилнинг январь ойида бўлиб ўтган норозилик намойишларининг яна икки иштирокчиси қатл этилганини хабар қилди.
Маълумотларга кўра, Аболфазл Сепаҳи Бажани ва Амирҳусайн Сафарий Ҳусейнабодий Исфаҳон шаҳрида дорга осилган. Улар 8 январь куни бўлиб ўтган намойишлар чоғида тўрт нафар полиция ходимининг ўлимига алоқадор деб топилган. Суд жараёни қандай ўтгани ҳақида маълумот берилмаган.
Ўлим жазоси ижро этилгани ҳақидаги хабарлардан сўнг ижтимоий тармоқларда бу қарорга қарши чиққан одамлар йиғилгани акс этган видеолар тарқалди. Шунингдек, Исфаҳонда норозилар билан хавфсизлик кучлари ўртасида тўқнашувлар юз бергани ҳам хабар қилинмоқда. Бироқ «Азаттиқ» радиоси ушбу видеоларни мустақил манбалар орқали тасдиқлай олмаган.
