Германияга Samara Academy ташкилоти орқали ўқиш ва ишлаш учун келган Қирғизистонлик 150 нафар қиз оғир вазиятга тушиб қолган. Бу ҳақда жамоат фаоли Медиса Жакиева қизларнинг мурожаатларини эълон қилди.
Уларнинг айтишича, сафарни расмийлаштириш учун ҳар бири 50 минг сомдан тўлаган. Бироқ Германияга келгач, уларга ишни ўзлари мустақил равишда топишлари кераклиги айтилган.
Қизлар ҳозир жуда оғир шароитда яшашаётганини билдиришмоқда. Айримларига ижара уйини тарк этиш кераклиги ҳақида огоҳлантириш берилган, аммо борадиган жойлари йўқ. Уларнинг сўзларига кўра, ҳозир қочқинлар учун мўлжалланган муассасаларда яшашмоқда. Бу ерларда гиёҳвандликка қарамлиги бор инсонлар ҳам истиқомат қилади.
Шунингдек, қизларнинг айтишича, бир хонада олти нафардан яшашган. Уларнинг фикрича, бундай шароит Германия қонунчилиги талабларига жавоб бермайди. Яшаш учун ҳар биридан 450 евро, транспорт харажатлари учун эса яна 120 евро олинган.
Қизлар Қирғизистоннинг ваколатли давлат органларидан ушбу вазиятга эътибор қаратишни ва уларга ёрдам кўрсатишни сўрашмоқда.
