14 октябрда Россияда “Нелегал-2025” федерал комплекс оператив-профилактик операциясининг иккинчи босқичи бошланди. Бу ҳақда Қирғизистоннинг Россиядаги элчихонаси хабар берди.
Эслатиб ўтамиз, «Нелегал» операцияси ҳар йили икки босқичда Россия Ички ишлар вазирлиги томонидан Россия Федерал хавфсизлик хизмати (ФСБ), Росфинмониторинг ва Коллектив Хавфсизлик Шартномаси Ташкилотига (КХШТ) аъзо давлатларнинг ваколатли органлари билан ҳамкорликда ўтказилади.
Асосий мақсад ноқонуний миграцияга қарши курашиш, миграция қонунчилигини, шу жумладан учинчи давлат фуқаролари томонидан бузилиш ҳолатларини аниқлаш ва олдини олишдан иборат.
«Нелегал» операцияси биринчи марта Россияда 2008 йилда ўтказилган.
Ушбу профилактика тадбирлари якунлангач, “Нелегал-2025” операцияси натижалари эълон қилинади.
Элчихона Қирғизистондан келган муҳожирларни ҳар доим ўзлари билан ҳужжатларни олиб юришга, амалиёт тугагунига қадар байрам ва йиғинларга бормасликка чақирди.
